Мой сайт Среда-Куншкачи, 13.12.2017, 02:37
Приветствую Вас Гость | RSS
Главная | Регистрация | Вход
» Меню сайта

» Наш опрос
Оцените мой сайт
Всего ответов: 369

Главная » 2007 » Октябрь-Ожоков » 1 » "КУЛЯТ-НОВОСТИ-XEBERLER"
"КУЛЯТ-НОВОСТИ-XEBERLER"
19:01

 
Тиринь келенть тонавтнеме – культуранть вельде
 ,     ,       
     Саранскоень 9-це номер школасонть эрзянь, мокшонь кельтнень тонавтомась ветяви зярыя иеть. Васенце шкастонть ульнесть стакачить тонавтыцянь коряс. Теке школасонть важодицятнень ютксо эрзянь ды мокшонь келень содыцят арасельть. Секскак савсь вешнемс ве ёндо. Течи тесэ важодить эсь тевень содыця, тиринь келень вечкиця од тонавтыцят. Эрзянь келень уроктнень вети Ольга Николаевна Кандрашкина. МГУ-нь филологической факультетэнь эрзянь отделениянть прядомадо мейле сон сеске сась важодеме школав. Од тейтеренть эзизе тандавто аволь покш зарплатаськак, тонавтыцякс улеме бажамось седе виевель. Ольга Николаевна вишка порасто саезь вечксы тиринь келензэ ды, вана уш колмоце ие мельспаросо тонавты эрзякс кортамо ошонь эйкакштнэнь.
     Эрзянь келень тонавтомась, кода ошонь лия школатнесэяк, ветяви факультативень лувсо. Эйкакштнэ ушодыть келень тонавтнеме омбоце классо, недлязонзо тень туртов максовить кавто част. Колмоце ды нилеце класстнэсэ келентень явови вейке час недлязонзо. Кодамо кель тонавтнемс, эрзянь эли мокшонь, эйкакштнэ арсесызь ды кочкасызь тетяст-аваст марто вейсэ кортнезь. А сепови, улить истят тетят-ават, конатнень арась мелест, штобу эйкакшост содаволь эрзянь эли мокшонь кель. Вийсэ, нама, киньгак а кармавтыть, эйкакштнэнь факультативстэнть нолдасызь кудов. Виде, неть тетятнеде-аватнеде аволь ламо, вейке-кавто ломанть.
     – Эйкакштнэнь ули бажамост тонавтнемс эрзянь келенть, – евтни тонавтыцясь Ольга Николаевна. – Секскак уроктнень лувост бажан ладсемс эйкакштнэнь туртов мельстуицякс. Эдь сынь эште вишкинеть, вечкить налксеме. Тень ловозь, налксеманть сеедьстэ тевс нолдан уроктнесэ, истя эйкакштнэнень седе шождыне тонавтнемс эрзянь валтнэнь. Свал ловнотано ёвкст, вешнетяно вейкетьксчить ды явовкст рузонсетнень марто. Тонавтницятненень пек вечкевить содамоёвкстнэ, нурька морынетне, валмеревкстнэ, стихотворениятне. Мель явтано эрзянь раськень койтненень-кирдатненень, перть-пельксэнь мазычинтень. Эйкакштнэ оймсема шкань каникулатнестэ свал яксить покштяст-сырькаест туртов велев. Тосо сынь марить ванькс эрзянь кельсэ кортамо, маласо теевить содавиксэкс раськень эрямонь лувонть ды койтнень марто, неить вирень-леень мазычинть. Уроктнесэ сынь мельспаросо евтнить теде, пачтить кенярксов ёжомарямост, невтить неезенть артовкссо. Кой-кона эйкакштнэ кортытькак эрзякс. Монь, кода тонавтыцянть, те пек кенярдовты.
     Эрзянь келень уроктнесэ Ольга Николаевна тевс нолды Н.Голенковонь «Уроки мокшанского, эрзянского» методической пособиянть, «Чилисема» эйкакшонь журналонть, эрьва кодат артовкст. Икеле сехте покш стакачикс ульнесь тонавтнема книгань аразьчись. Тедеде, окойники, те асатыксэсь куш аламодо витевсь. Школантень састь эрзянь ды мокшонь келень коряс омбоце классонь туртов од учебникть. «Эрзянский язык в русских школах» книганть сермадыцянзо – МРИО-нь важодицятне Е.В.Вальчук ды С.Ю. Дмитриева. Сон седе шождалгавтсы келень тонавтнеманть. Ней кадови учомс тонавтнемань книгат колмоце ды нилеце класстнэнь туртов. Паряк, маласо шкастонть кармить нолдазь неть учебниктнеяк. Тонавтыцясь тень коряс евты покш кемема ды энялды топавтомс те тевенть седе куроксто.
     Тонавтомань книгатнеде башка истя жо пек аламо нолдавить методической ды наглядной пособият. Омбо масторонь келень тонавтнемань уроктнесэ кодат ансяк кедьёнкст арасть. Мекс жо эрзянь келентень истямо мель а явови ды а нолдави мазый, мельстуиця ули-паро? Сестэ тонавтыцятнененьгак улевель седе шождыне ды эйкакштнэньгак мелест кепетевель келенть домкасто содамонтень.
     Тонавтыцянть мелявтовты се ёнксоськак, келень тонавтнемась а поладови покш класстнэсэ. Ламот эйкакштнэстэ бажить келень содамонтень, ансяк нилеце классонть прядомадо мейле те тевесь лоткавтови. А эдь эйкакштнэстэ редявкшны покш ёрокчи, кона седе тов эряволь кастомс ды виевгавтомс. Ды, бути асатыксэсь куроксто а витеви, сестэ куш вишка класстнэсэ, паряк, теемаль тонавтоманть урококс, аволь факультативекс.
     Весе стакачитнень лангс апак вано, школась свал ульнесь ды кадови раськень культуранть, койтнень-кирдатнень кис аштицякс. Истямо лув кирдеви 9-це номер школасонтькак.
     – Минек школасонть сеедьстэ ютавтневить эрьва кодат мероприятият, – поладызе кортамонть школань прявтонть начальной класстнэнь коряс полавтыцясь Елена Вячеславовна Михеева. – Юткстост ламотне сюлмазь эрзя-мокшонь раськень теманть марто. Мелят сентября ковось алтазель эрзянь-мокшонь кельтненень. Эйкакштнэ ладсесть ламо стихть, сермадсть ёвтнемат, артсть артовкст. Важодевкстнэ анокставсть покш мелень путозь. Башка тешкставсь Аня Чернова. Тейтернесь сермадсь пек паро стихотворения тиринь веледе. Кельтненень алтазь ков карми улеме ютавтозь тедедеяк. Ковдонть башка иень перть весе лия мероприятиятнесэ мель явтано раськень темантень. Эйкакштнэ тонавтнить ды ёвтнить эрзя-мокшонь сермадыцятнень стихест, морыть мазый морот. Эряви меремс, эйкакштнэ сцена лангс лиснить раськень оршамопельсэ, конатнень стамосонть-викшнемасонть тенст лездыть тетятне-аватне.
     Вана истя, аламонь-аламонь Саранскоень 9-це школасонть бажить вельмевтеме ды кастомс эрзя-мокшонь раськень культуранть, тиринь кельтнень ванстомо. Чарькодеви, весемесь ды сеске а топавтови, эрьва тевентень молема эскельксэнь эскелькс. Ушодксось теезь пек паро, ансяк бу сон аволь лоткавтово ды сестэ стакачитне изнявить.
Алексей Мишин саизе «сырненть»

       Мордовиянь пелькстыцясь Алексей Мишин греко-римской тюремань коряс Мирэнь чемпионатсонть, кона ютась Азербайджансо, саизе сырнень медаленть. Пелькстыцятнень ютксо, кинь сталмост 84 килограммат, сон изнизе американецэнть Брэд Верингень. Мирэнь чемпионатсо Россиянть туртов те «сырнесь» кармась улеме «васенцекс».
       Мордовиянь Прявтось Николай Меркушкин кучсь Алексей Мишинэнь ды сонзэ тренерэнть Александр таракановонь лемс поздоров марто телеграмма.
       «Эсенк спортивной подвигсэнть Тынь теинк сень, мезенть Мордовиясь учось уш ламо иеть – кармиде улеме историясонть Мирэнь васенце чемпионокс, кие кастозь Мордовиясо, греко-римской бороцямонь республиканской школасонть. Ней тынь целанек весе сырнень казнетнень саиця. Россиянь чемпион, Европань чемпион, Олимпийской налксемань чемпион ды, окойники, кувать учневиця, сехте покш изнявксось – Мирэнь чемпион», – кортави республикань Прявтонть поздоровсонзо.
       Николай Меркушкин евтась кемема, Мирэнь чемпионатсонть Алексей Мишинэнь пек паро тюремась панжи ки Мордовиясо спортонь воспитанниктнень туртов мировой сехте покш изнявкстнэнень.
«Тынь – минек республиканть мельспарозо. Спортсо покш ды ломанень паро качестванк кувалма мельспаросот земляконк, мельспаросо весе Россиясь. Эсенк изнявкссонк кандыде покш лезэ россиянь спортонть седеяк содавиксэкс теевемантень, лия мастортнэсэ сонзэ авторитетэнзэ кемекстамонтень. Ды минь алкукс кемтяно, икеле Тынк учи спортсо эште аволь вейке изнявкс. Седейшкава арсян Тенк кеме шумбрачи, уцяска, изнявкст спортсо ды эрямосо, паро тевть весе Тынк ушодкстнэсэ минек ине Россиянть лезэс, минек тиринь Мордовиянть лезэс!» – тешкстызе Николай Меркушкин.
       Мирэнь чемпионось «ТелеСеть Мордовия» (10-це каналось) корреспондентэнть марто кортамсто тешкстызе: «Сетненень, кие кемсь монень – покш сюкпря! Прям марян парсте. Мон, окойники, изнинь нилецеде снартомастонть. Тюремась ютась апак тално».
       Алексей Мишин тешкстызе, чемпиононь лементь кис тюремась ульнесь стакакс, те ладясь пелькстамотнень лувонтень. Мирэнь чемпионатонть прядовомсто мезеськак шождасто а добовавкшны.
       Мишин ёвтнесь, келя, Мирэнь ютазь чемпионатсонть сон тюрсь малав вейке пильгсэ сезезь санонзо кувалма. Чемпионатонтень мольсь покш кемема марто, парсте анокстазь. Те кандсь изнявкс. Сон истя жо евтась сюкпря весенень, кие аштесь кисэнзэ ды евтась поздоровт тиринь Мордовиянтень.


     
Просмотров: 583 | Добавил: erzyany-rasyke | Рейтинг: 0.0/0 |
Всего комментариев: 0
Имя *:
Email *:
Код *:
» Форма входа

» Календарь новостей
«  Октябрь-Ожоков 2007  »
ПнВтСрЧтПтСбВс
1234567
891011121314
15161718192021
22232425262728
293031

» Поиск

» Друзья сайта

» Статистика


Copyright MyCorp © 2017
Сделать бесплатный сайт с uCoz