"Масторава" морокерькс, сезь http://incubator.wikimedia.org/wiki/Category:Erzya_Wikipedia - эйсензе васенцеде вейке лувс пурназь минек космогониясь; менелень ды масторонь пазтнэнь пантеонось; героической эпикась — эрьва кодат кезэрень исторической моротне-евтамотне ине героест марто, конатнень ютксо куншка видьсэ ашти Тюштя инязорось; койтне-илатне, перть пельксэнть ды эрямонть лангс вановкстнэ, эстетикась, философиясь, педагогикась.
 
Эпосось ванстынзе неень шкас эрзянь ды мокшонь ине геройтнень лемест: Инешкипазонть (мирэнть-масторонть теицянть), Ангенть (Инешкиаванть, мазыйчинь пазаванть), Идемевсенть (идем вийтнень азоронть), Кудадеенть (эрзянь раськенть ушодыцянть), Тюштянть (эрзянь ды мокшонь масторонть пурныцянть), Нарчатканть (мокшонь чинязор-аванть, печказтнэнь каршо набой тюрицянть), Саманьканть (Казань ошонть саицянть) ды ламо лиятнень. Сынь весе — минек раськенть каштанчись ды мазыйчись. Истя сёрмады эсинзе "сермадозь пакшадонть"- "Масторава"-донть Шарононь Сандра (А.М. Шаронов), кона "Масторава" морокерьксенть кисэ 1995 иестэ казязь Мордовиянь Республикань Государственной Казесэ, ды 1997 иестэ Васенце Сёрмадыцянь Казесэ М. А. Кастренаннь вейсендявксонть.
"Масторава" морокерькстенть:
Ютазь пингень 1994-це иесь Эрзянь культурань зрямосо тешкстазь «Масторава» эпосонть-морокерьксенть лисемасо, конань эрзянь ды мокшонь кезэрень мифтнень, эпической моротнень ды ёвтамотнень коряс сёрмадызе А.М. Шаронов фольклористэсь. Сон топавтсь истямо важодевкс, кона аравтови мирэнь-масторонь келес содавикс истят памятниктнень ваксс, кода Э. Лённротонь «Калевала», Ф. Крейцвальдонь «Калевипоэг», А. Пумпуронь «Лачплссис» ды лият. «Масторава» эпоссонть невтевить эрзятнень ды мокшотнень эрямо пингестэ сехте редявикс событиятне-эрямотне. Васенце таркасо ашти мелявксонзо марто ломанесь. Эпоссонть пачтяви, кода эрясь, мезде арсесь ды мезес бажась эрзянь раськесь кезэрень шкатнестэ. Эрьва морось, эрьва ёвтамось эйсэнзэ — те моро ло-манде, седе, кодамокс эряви улемс, кода мелявтомс эсь раськенть уцяскннзо кисэ.
Васенце пелькссэнть (Пазонь пинге) ёвтневи, кода Инешкипазось теизе мирэнть-масторонть; кортави Анге нидензэ, кона чачты тензэ сисем эйкакшт: Верепаз, Пурьгипепаз, Веленьпаз, Масторпаз, Кастарго, Везорго ды Ведьава. Мастораванть сюпавчинзэ ванстоманть кисэ, Инешкипазось теизе эрзянь ломаненть ды ветясь тензэ ни: кадык касы-рашты эрзянь раськесь. Седе тов ёвтневи лия пазтнэнь чачомадо, ломантнень ды пазтнэнь ютксо чиямодо-урьвакстомадо... Эрзятнень ды мокитотнень кезэрень вановтост коряс, пазтнэ ды ломантне вейсэ ладить мирэнть-масторонть. Пазтнэ аволь ломантнень прявтост, сынь весемесэ лездыть тенет.
Омбоце пелькссэнть (Кезэрень пинге) ёвтневи башка сыметнень-буетнень всйсэндямодо, ломантнень ютксо од эрямонть ладямодо, минень-сюнонь зыяндо эсь масторонть ванстомадо. Ламо стакачинь печтязь тень теить Андямо, Кудадей, Тёкшонь ды лия геройтне-инязортне. Невтевить ломантнень ютксо од семиясо ды вейкс сюлмавкстнэ.
Колмоце пелькссэнть (Тюштянь пинге) кортави, кода кувать вешнемадо мейле эрзятне ды мокшотне пурныть эстест инязор, кона паролгавтсы эрямост, лади од койть-илат, идесы масторонть инегуйтнеде ды Сарда хандонть. Но сы куломась, Тюштя кадсы эсь раськензэ ды велявты одов менелев. Од инязорокс ломантне кочкасызь сонзэ веженсь цёранзо, конань истя жо лемдясызь Тюштякс. Шкась полавтови, эрзятнень ды мокшотнень каршо сырги виев ят, ды эсь раськензэ идеманть кисэ Тюштя саи мель туемс мартонзо лия масторов.
Нилеце пелькссэнть (Ятонь пинге) ёвтневи эрзятнень ды мокшотнень лангс печказтнэнь каявомадо. Тесэ минь вастовтано Арсай прявтонть, Канява, Нарчатка, Кастуша мазый тейтертнепь марто. Весе сынь путыть виест вейке покш тевентень — ванстомс эсь масторонть нулгодькс ятонть эйстэ. Ветеце пельксэнть (Од пинге) юрсо аштить «Од пинге», «Саманька», «Шекшата пандо» летописень моротне, «Пижень сюро» ёвтамось, конасонть чудань пижснь сюронть вельде эрзятненень ды мокшотне-нень максовить превть, кода эрямс од шкастонть. Невтевить ломантнень эрямосо сеть покш лиякстоматне, конат сюлмавозь Рузонь масторос совамост марто. Эрзятнень ды мокшотнень фольклорсост сехте ламо моротне, преданиятне ды легендатне Тюштядо. Секс «Масторава» валморонтькак Тюштя саи прявт тарканть. Эпосонть ванномсто минь васттано фольклоронь сёрмадовкстнэнь марто зярыя авейкетьксчить. Кезэрень тексттнэ-сермадовкснэ ладсевсть ламо пингень перть, секскак эрьва моронть улить зярыя вариантонзо, конат шканть молеманзо марто пештявсть од ёнкссо; полавтовсть те эли тона тевтнень лангс ломантнень вановтост, лиякстомсь Тюштянь лувось. Истя чачсть морот, конатнесэ эрзятнень прявт героенть певтемасо вастневить сатирань ёнкст. Мертяно, ве моросонть ёвтневи седе, кода Тюштя муи вирьстэ рузонь карь, тандады ды эсь раськензэ марто кадсы эрямо таркаст. Лиятнесэ Тюштя малавгавтови алкуксонь эрямосто саезь инязортнэнь марто ды тень пингстэ невтеви кежейкс, сюпавчис правтыцякс; сон арси ансяк эсь прядонзо, мик стувтсы эсь раськензэяк.
«Масторава»-со Тюштя малавикс фольклоронь васенце сермадовкснэнь, конатнесэ сон а явови эсь раськензэ эйстэ, весе мелензэ-превензэ путы ломантнень эрямост паролгавтомантень. «Масторавас» совавтозь зярыя таркат, конат арасть кезэрень тексттнэсэ: вастовтано Вирьаванть марто; покштя марто, кона ёвтни Литова тейтерденть; Тюштя тюри инегуйтнень каршо, ды те тюремась невтезь волшебно-фантастической евксонь тюссо; Тюштя эсь раськень коензэ-кирданзо тонавтнеманть кисэ яки масторганзо; ды мекевланг, «Масторавасо» а невтеви эрзянь ды мокшотнень ютксо явовомась — веенст эйстэст кадовить кашадо ярсамо, омбонстнэ туить Тюштя марто; бути кезэрень тексттнэсэ ятокс невтеви рузонь инязорось, «Масторавасо» те асодавикс ят... Весемесь те теезь вейкень кисэ: моротнень, преданиятнень ды легендатнень сюлмамс вейке сюжет марто мельга-мельцек молиця произнеденияс.
«Масторава»-со минь васттано пазтнэнь ды ломантнень ютксо ламо полань саемат. Бути варштамс М.Е. Евсевьевень «Мордовская свадьба» ды К.Т. Самородовонь «Мокшень свадьба» важодевкстнэнь, несынек: «Масторавасо» невтевить допрок лия койть-кирдат, свадьбань налксемат. «Пурьгинепаз ды Кастарго», «Масторпаз ды Вирьава», «Мазый Дамай» моротнесэ ды Тюштянь полань саеманть ютксо ламо вейкетьксчить, теке марто нетяно допрок лия обрядонь налксемат ды художественно-эстетической лия произведеният. Тюштянь свадьбанзо невтемстэ вейсэндявить полань саема ды калмамонь койть. Ды те чарькодеви: кезэрь пингстэ мирденень тейтерсень максомась лововсь тоначив туемань кондямокс.
«Мастораванть» сёрмадомсто А.М. Шаронов невтизе прянзо алкуксонь поэтэкс. Эпосось сёрмадозь эрзянь ванькс кельсэ, кона сюпав метафорасо, эпитетсэ, сравнениясо. 2003-це иестэ сон лиссь рузонь кельсэ, ютавтызе сонсь сёрмадыцясь. 2004-це иестэ И.М. Яушев лемсэ театрасо «Масторава» моро керьксенть юрсо путозель «Тюштя» невтевксесь. Эрявить тешкстамс Моро керьксенть артовкстнэньгак, конат кеместэ сюлмавозь содержаниянзо марто. Сынст теинзе Россиянь заслуженной художникесь Н.С. Макушкин. «Масторава»-нть сёрмадомсто А.М. Шаронов нежедсь эсензэ таштавкстнэнь ды фольклоронь сетъ материалтнэнь лангс, конатнень пурнызь X. Паасонен, М.Е. Евсевьев, А.А. Шахматов, П.И. Мельников, А.И. Маскаев... Те тешкстазь книганть песэ невтевкстнэсэ, ёвтазь, косто саезь те эли тона морось. Седе видеть кармить улеме истят валтнэ: «Масторава» эпосось-морокерьксесь — те эрзянь ды мокшонь раськенть художественной автобиографиязо, кона сюпалгавтызе весе минек культуранть. Кадови ансяк вейке мелявто-ма — а стувтнемс Тюштянь валонзо:
— Марямизь, эрзят, Инешкинь раськеть!
Марямизь, мокшот, Шкабавазонь эйдть!
Тюштянь валонзо парсте кунсолынк.
Бути чачиде Инешкинь эйдекс,
Инешкинь эйдекс яла уледе!
Свал ансяк эсенк кельсэ кортадо,
Свал авсяк эсенк мельсэ арседе,
Свал эсенк коенк-иланк ванстодо,
Свал эсенк ломанть прявтокс путнеде.
Сестэ а еми Эрзянь масторось,
Сестэ нежеди лия паро шка...
«Масторава» морокерьксэнь Чись Омбоце Эрзянь Инекужонть путоньмелензэ (Резолюциясь), кона ютась 2006 иень чадыковонь 16 чисте (Саран ош) коряс карми ней тешкстневеме ацамковонь 21-це чистэнть. Шарононь Сандра те ковчинть (дата) шнызе. Те чистэнть Чизэ рашты, карми касомо.
|
