Мой сайт Среда-Куншкачи, 23.08.2017, 07:16
Приветствую Вас Гость | RSS
Главная | Регистрация | Вход
» Меню сайта

» Наш опрос
Оцените мой сайт
Всего ответов: 369

Главная » 2007 » Октябрь-Ожоков » 25 » ЭРЗЯНСКАЯ ПРЕССА " ЭРЗЯНЬ ПРАВДА" КУЛЯЛОПАСЬ ИНЖЕКС КЕДЬСЭНЕК
ЭРЗЯНСКАЯ ПРЕССА " ЭРЗЯНЬ ПРАВДА" КУЛЯЛОПАСЬ ИНЖЕКС КЕДЬСЭНЕК
12:19
“Васоло эрязь, седеяк пек кармат чарькодеме тиринь келенть питнензэ”
     
 
 
  Тееведе содавиксэкс: Наталья Константинова. Эрзянь тейтерь. Чачсь Орданьбуень Луньга велесэ. Школанзо прядомадо мейле мель сайсь тонавтнемс Н.П.Огарев лемсэ МГУ-нь филологиянь факультетэнь эрзянь отделениясо. Иень ютазь тонавтнеманзо поладызе Эстониясо, Таллинн ошсо. Наташа нейгак эри тосо. Аволь умок сон сакшнось Мордовияв. Саранскойсэ улемстэ совсесь минек редакциявгак. Кода сон понгсь Таллиннэв, кода ладявсь ды моли тосо эрямозо, кевкстнинек эсензэ тейтеренть.
       – Наташа, васенце кевкстемам: кода тон, эрзянь тейтересь, понгить Таллиннэв тонавтнеме?
       – Школанть прядомадо мейле (те ульнесь 1997 иестэ) сынь тонавтнеме Н.П. Огарев лемсэ МГУ-нь филологиянь факультетэнь эрзянь отделенияв. Секе иестэнть Эстониясто састь тердемат зярыя од ломанть кучомс тонавтнеме тосонь вузов. Монень, кода группань старостантень, мерсть, кевкстемс, кинь ули мелезэ молемс Эстонияв тонавтнеме. Мелест евтызь ламот. Эсь прям сермадыя монгак. Тов эрявсть 4 ломанть. Секс савсь ютавтомс конкурс. Сермадынек сочиненият. Сынст ванкшнынзе Н.С.Баюшкин. Те ломанесь таго-зярдо эрясь Мордовиясо. Профессиянь коряс филолог. Сон ней эри Таллиннсэ. Эстонияв туемадонзо икеле тонавтсь эрзянь кель Мордовиянь вейке вузсо. Сехте вадря сочинениятнень юткс понгсь монсеськак.
       – Истя понгить Таллиннэв? Косо мейле кармить тонавтнеме?
       – Тонавтнеме карминь Таллиннэнь педагогической университетсэ. Тонавтома лувонть, чарькодеви, савсь тенек полавтомс. Васня вейке иень перть тонавтнинек эстэнь келенть. Теке марто тонавтнинь финнэнь филологиянть. Седе тов арсинь тонавтнемс эрзянь кельстэ финнэнь кельс ютавтыцянь тевенть, “реклама ды медиа” специальностенть.
       – Стакаль-аволь ведрук тонавтнемс зярыя кельть?
       – Чарькодеви, а шождаль. Эстэнь ды финнэнь кельтне кадык малавиксткак эрзянсентень, сынст эрьванть овсе лия кортамонь, сермадомань коест. Сехте покш стакачись ульнесь – шкась максозель аламо. Ды ялатеке мерян, кинь ули мелезэ тонавтнемс кель, сень мезеськак а тандавтсы.
       – Кода, ванса, тоньгак? Маринь, школасояк, вузсояк тонавтнить пек парсте?
       – Школасо аттестатсом лиснесь вейке “ниле”, вузсо – весе “ветельть”.
       – Зяро иеть тонавтнить Таллиннэнь вузсо?
       – Мон нейгак тонавтнян. Васня, ниле иень ютазь, идия филологонь дипломонть. Но педагогической образованиявтомо. Тень кисэ таго 2 иеть эрявсь тонавтнемс. Тень лангскак эзинь лотка. Тедедень кизна максынь документэнь аспирантурав. Тонавтнян культурологиянь факультетсэ (сон секе университетсэнть) “весе раськетнень ютксо отношеният” специальностенть коряс.
       – Ней уш, ловт, сисем иеть, кода тон Эстониясат? Кода марят тосо прят, мезе лангс эрят?
       – Те кевкстемась, маряви тень, сехте талновтыця. Эринь ды эрян эсень вийсэ. Аванень ды тетянень лездамс тень, истя мерян, а мейсэ. Мондень башка кудосонок таго кавто эйкакшт. Сынст эрявить стявтомс пильге лангс.
       – Кода эно лиснят? Косто сайнят ярмакт ярсамс, эсь прянть оршамс?
       – Васня эринь стипендия лангс. Сон тосо аволь вишкине – 1800 кронат. Целковойсэ ловозь, те 4 тежат. Виде, малав пелензэ (800 кронатнень) савсь максомс эрямо тарканть кисэ. Косто-косто тенек лездась ды лезды “Финно-угрия” вейсэндявксось, косо прявтокс Яак Прозес. Те вейсэндявксось эсензэ лангс сайни кизна эрямо тарканть кисэ пандоманть. Ней карминь важодеме. Муинь тарка Таллиннэнь вейке портсо.
       – Сон сюлмавозь филологиянь тевенть марто?
       – Кода меремс? Бути варштамс сень лангс, те тевсэнть эряви содамс ламо кельть, то – сюлмавозь. Монь вельде ломантне, рузокс мерезь, сайнить “бронь” се-тона билет лангс. Седе сеедьстэ телефонга гайневтнить, меремс, костояк Германиясто, швециясто, Финляндиясто эли кодамояк лия масторсто. Монь тевем – кунсоломс ды топавтомс сень, мезе сынь вешить.
       – Мерят, гайневтнить Швециясто, Германиясто... Лисни, сынст кельскак чарькодят?
       Сави чарькодемс. Англань келенть содаса а беряньстэ. Германиясо эрицятне жо те кельсэнть кортыть вишка пингстэ саезь.
       – Зяро кельть тонсь ней содат?
       – Ловомам коряс – кото. Сисемеценть – шведэнсенть – тонавтнян. Зярс ансяк чарькодян эйсэнзэ.
       – Таллиннсэ, содан, эрить ламо эрзят. Кирдтядо-арась сюлмавкст эсенк ютксо?
       – Аволь ансяк кирдтяно. Минь соватано тосонь вейсэндявкстнэс. Эрзянь ды мокшонь вейсэндявкстнэде тосо кавто. Вейкенть прявтсо Р.А.Клинова. Омбоцесэнть тевтнень ветясь Н.С.Баюшкин. Аволь умок сонзэ таркас кочкимизь монь.
       – Мезе кенерить тееме, те вейсэндявксонть прявтсо улезь?
       – Кенеринь аволь пек ламо. Шкась тень туртов арасель. Ялатеке ледстяса? Тешкстынек вейсэндявксонть 10 иень юбилеензэ. Муинек Финляндиясто ломанть, кить содасызь эрзянь келенть. Колмо финнт тонавтнить Хельсинкинь университетсэ ды пек парсте кортыть эрзякс. Вейсэндявксонок нолды журнал. Лемезэ “Кудо”. Эйсэнзэ макснетяно кулят, статьят эстэкс ды эрзякс.
       – Саранскойсэ умок ульнить?
       – Маныть сакшнынь.
       – Кодамокс сон теть неяви? Полавтовсь-эзь?..
       – А мезть сепомс, Саранскоесь касы, кепети, мазылгады. Лия лиякстомат эйсэнзэ а неян. Кода арасельть эрзякс, мокшокс сермадовкст, истя нейгак арасть. Филологиянь факультетсэяк, совсинь тов, мезеськак эзимим кецявто. Студентнэ, марявсь тень, мезескак а бажить. Икеле, зярдо минь тонавтнинек, яксинек драмкружоков, путнинек спектаклят. Ней тосо мезеяк арась.
       – Васоло эрязь, седеесь а терди кудов?
       – Кудов седеесь свал терди. Кода парсте илязат эря лия масторсо, кудосо ялатеке седе паро. Эстониясь монень ламо макссь. Тосо неинек, кода ломантне вечксызь эсест келест, культураст. Лиясто натой сельметькак сявады, кода тосонь эрицятне апак визде кортыть эсест кельсэст. Мордовиясояк, паряк, меельце шкастонть седе лоткасть виздемеде эсест кельсэ кортамо. Ды ялатеке, эрзятнень ды мокшотнень эйсэ зярс допрок эзь сыргозе эсь раськень ежось. Меельцекс евтаса, васоло эрязь седе пек кармат чарькодеме эсь келенть питнензэ. Монгак чарькодия. Ды тердян лиятненьгак: вечкеде эсь келенк, илядо визде эйсэнзэ кортамо. Те – минек сехте покш сюпавчинек.


Пеедькшнемат

       Моли казармава генерал, ванкшны ваньксчинть, мельганзо чии старшина.
       Совась васенце казармантень, неи тумбочканть ало пуль:
       “Мезе истямось? Шлямс! Ёвтынк валмеревксэнть!”
       Весе рядовойтне ведрук:
       “Ваньксчись кемексты шумбрачинть”!
       Сови омбоцес, неи: киякссо празь спичка:
       “Мезе истямо? Те берянь! Кепедемс! Ёвтынк валмеревксэнть!”
       Весе таго хорсо:
       “Ваньксчись кемексты шумбрачинть!”
       Истя жо тевтне аштесть весе лия казарматнесэяк.
       Совась меельцентень, неи тодовонть лангсто толгине:
       “Мезе истямось? Рудаз, шлямс! Ёвтынк валмеревксэнть!!”
       Майсиця солдатнэ вейсэ:
       “Тувось свал муи рудаз!”


       Сась корреспондентэсь психиатрической больницяв ды неи, сэредицятне латонть лангсто кирнявтнить коникнек.
       – Мезе тынь тейтядо? – кевкстни корреспондентэсь.
       – “Аэрофлотсо” налксетяно, – отвечить сэредицятне.
       – Косо директорось?
       – Минь сонзэ васенце рейссэнть ильтинек.
       * * *
       Кандынзе вейке цёрась часонзо витницянтень. Тонась калавтнинзе, частнэстэ прась кулозь таракан. Мастерэсь корты:
       – Э-э-э, браткем, несак, тонь машинистэсь кулось!
       * * *
       Ливти самолётось, апак учне ветицязо верьга вайгельть раказевсь.
       – Мезе лиссь?
       – Мезе карми теевеме ормазатнень кудосонть, зярдо фатить, мон оргодинь?        * * *
       Эрямосто.
       Цёрась кунсолы перть-пелькстэнть пачтямотнень: “Сибирьсэ -45о С. Эзь кемезеве, гайгстась ялганстэнь Сибирев:
       – Кунсолока, тынк тосо, кортыть, пек якшамо?
       – Цидярдсынек, -20-25о С.
       – Ансяк? Телевизорга жо мерсть -45о С?
       – А-а-а… Эдь те, паряк, ульцясо!
       * * *
       – Вадик, ёвтнек, мезе тонеть казсть чачома чистэть?
       – Несак вальманть ало 600-це “мерсэнть”, пижелдыцянть!
       – Ага! Паро машинась!
       – Самай истямо тюсонь картузке…
       * * *
       Семиянь тевть
       Братось кевкстни веженсь сазорнэнть:
       – Косо тон ульнить?
       –Машанень якинь.
       – Ды мезе тынь теиде?
       – Някасо налксинек.
       – Кие эйстэнк изнясь?
       * * *
       – Истямо ладсо, мебеленть ды лия курмотнень-кармотнень апак сёвно явсынек вейкетьстэ?
       – Нама…
       – Ды вейке-вейкень а карматано покордамо. Бути вастовтано, седейшкава шумбракстнетяно…
       – Ансяк истя.
       – Ды явовомстояк прянок карматано ветямо парсте, вейке-вейкень лангс апак кайсеве? Истя?
       –Улезэ тонь койсэ.
       – Пек паро. Сестэ капшатано – кемень минутань ютазь минек свадьбанок!
       * * *
       Вастовсть кавто оят. Вейкесь кевкстни:
       – Кода эрят?
       – Весемесь ладс: ним ды эйкакшом – кода весень. Тон жо кода?
       – Мон эсь нинть марто яван.
       – Тон мезть, нить истя вечксы важодеманть, ваньксчинть, свал кудоютконь тевсэ.
       – Самай теньсэ тувталоськак, стят веть симеме, велявтат – ацамотне уш пурназь.
       * * *
       Кортнить кавто ялгат:
       – Вася, мезе бу тон меревлить, бути бу вастовлить истямо тейтерь-ава, кие весементь простясы, седеймариця, жалиця ды парсте пиди-пани?
       Вася арсезевсь ды мерсь:
       – Шумбрат, авай…
       * * *
       – Тынк нись важоди?
       – Важоди. Ютавтыцякс.
       – Косо?
       – Лавкасо.
       – Кода чарькодемс “лавкасо”?
       – Истя чарькодемскак: якси лавкатнева ды ютавтни монь ярмактнень.
       * * *
       Тейтерь-авась ёвтни ялганстэнь:
       – Монь мирдесь – од койсэ картинань артыця, ды минь пек ладятано: валске марто сон рисови, мон жо пидян-панян. Чить жо минь толковатано, кинь мезе лиссь.
       * * *
       Нись – мирдентень:
       – Минь овсе ковгак а яксетяно…
       – Паро, ванды молян шукшпрянь ёртомо, сайтян мартом.
 Эрзянь морот - Народное творчество

Тиринь ёнкс
х х х

       Пек мазый монь тиринь енксось:
       Паксят, лугат, вирть ды лейть…
       Эйкакшпингень сон прок евксось,
       Свал сыргавты валдо мельть.
       Палси чамам лембе вармась,
       Цветить садсонть умарень чувтт.
       Пелькстамо цековтне кармасть,
       Ливтить коштсонть цецянь сувт.
       Энгамсь менельсэнть пургинесь,
       Эци судос цецянь чинесь.
       Оймавтсы оймем менелесь,
       Сон пельтеме сэнь ды ванькс.
       Монь кастымим эрзянь велесь,
       Арсян, эрявикс ломанькс.
       Мазый велесь, козонь чачинь,
       Эринь тосо касомас.
       Тиринь авань мазый чачонть
       Мон а стувтса куломас.
       Пек мазыйть веленть ульцянзо
       Нилеце пинге вансты прянзо.
       Чевте седейть эрицянзо,
       Цитнить сиякс лисьмапрянзо.
       Куломас вечкса мастором,
       Чачсь монь тесэ васень мором.
       Вечксынь жойниця килейтнень,
       Састыне чудиця лейтнень,
       Мазыйде мазый монь веленть,
       Сэняжа сельме менеленть,
       Сиякс цитниця эрькензэ,
       Пурьгинень мазый чирькензэ.
       Сынст лангс ванозь одов вельминь,
       Кенярксто пешкедить сельмень.
       Ине ведекс паксянзо лымбакснить,
       Ламо сюро эрьва ие макснить.
       Тонь чачтынзеть евксонь мастор,
       Свал мазыят эрьва шкасто:
       Эрьва кува вешнеме ютадо,
       Седе мазый таркат а мутадо.
       Пек мазый монь эрзянь енксось,
       Паксят, лугат, вирть ды лейть,
       Эйкакшпингень сон прок евксось,
       Свал сыргавты валдо мельть.



Паро тевс
х х х

       Седеень ёжот неяви
       Тевстэть-валстот.
       Сон зярдояк а явови
       Кшистэть-салстот.
       Бути кшинть паньсак тантейстэ –
       Седей витят.
       Эрьва тев теят седейстэ –
       Кеняркс видят.
       Паро тевс свал седей лембе
       Путыть ломанть.
       Эзть лавшомгадо сынь седе
       Ды эзть ёма.
       Седеень тевесь ды валось
       Раськекс савить.
       Зярдояк кода кшись-салось
       Сынь а явить.


Эрьзя
х х х

       Эрьзянь мастор ды Сура ёнксонь
        вирь,
       А мади тынк цитниця славась.
       Эдь тесэ чачсь вирь тяка богатырь
       Сонзэ лавсьсэ нурьсекшнесь
        Вирявась.
       Пингензэ перть седеезэ лакась
       Невтемс мазычинть эрямонь лувсто.
       Мик Аргентина масторов якась,
       Чевте седеенть панжсь калгодо
        чувтсто.
       Чувтсто сон невтсь историянь
        геройть
       Кинь лемесь маней тештекс сырежди.
       Неть – Микеланджело ды лев Толстой,
       Конатнень покш тевест ломанть
        эждить.
       Калгодо чувтсто панжсь авань
        седейть
       Сонзэ тевезэ – эрямос кемема.
       Ине Эрьзя – тон раськень знамя ней,
       Тон минек славась ды минек
        вечкемась.
       Гувны эрзятнень оймесэ толгель
       Сонзэ ладсо бу мазыйстэ эрямс.
       Кассы раськень седейс паро мель –
       Эрьва эрзянтень улема Эрьзякс.


Аванзо лайшема
х х х

       Мезе моли эрямосон,
       Козонь пачкодинек минь?
       Парочись сявордсь калдорсо, –
       Витя, теть пижнян: “Ёминь!”
       Вейкесь армиясо служась,
       Оймезэ седей вакссон.
       Вальмазонок стукадсь нужась, –
       Кандолазсо уды сон.
       Тюрематнесэ эйкакшт тардить,
       Чись тенст маряви ней векс.
       Сынст кисэ раськест авардить:
       “Мекс пужить цецянок, мекс?
       Мекс истя монь оймесь майси?
       Мейсэ чумонок минек?
       Сельведь потс эрямось вайси,
       Пиризь валдочис кинек.

Эйкакшонь - Детский

Лейбрясто – Сура леев

      


Чувто прясо Варака

       Вирьсэ, чувто прясо озадо аштесь Варака. Нардтнесь нерензэ салазь сыр печтькенть сэвемадо мейле.
       – Кар-р-р-р! – карнозевсь мельспародонть. – Кодамо паро эрямось!..
       Ашти Варака, мезеяк а теи.
       Юты килеенть алга Верьгиз. Неизе Вараканть.
       – Варака, а Варака, мезе теят?
       – Мезеяк а теян.
       – Те кода истя?
       – Озак, тонгак варчасак.
       Озась Верьгизэсь килеенть алов. Ашти, мезеяк а теи.
       Юты килеенть вакска Ривезь. Вансы, Верьгиз озадо ашти.
       – Верьгиз, а Верьгиз, мезе теят?
       – Мезеяк а теян, аштян.
       – Те кода истя?
       – Озак, тонгак варчасак.
       Озась Ривезьгак. Аштить кавонест, мезеяк а теить.
       Юты килеенть вакска Нумоло. Вансы, Верьгиз марто Ривезть озадо аштить.
       – Эй, ялгат, тынь мезе истя тейтядо?
       – Мезеяк а тейтяно, аштетяно.
       – Те кода истя?
       – Озак, тонгак варчасак.
       Озась Нумолояк. Аштить колмонест килеенть ало, мезеяк а теить.
       Зярыя шкань ютазь ваксозост «мезеньгак а тееме» озасть Ур, Вирьсараз, Идем яксярго. Аштить весе, мезеяк а теить…
       Те шкане вирь кужонтень лиссь охотник. Варштась озадо аштицятнень лангс, сельмензэ цють сельмеварясто эзть лисе. Чинь-чоп, келя, вирьганть якинь, весе пильгень чавинь, киньгак эзинь васто. Тесэ, ванта, весе вирень эрийтне пурнавсть.
       Ладизе еност ружиянзо, ды «ба-ба-ба-бах» леднинзе весень. Пурнынзе-теинзе идем ракшатнень, нармунтнень кескавозонзо ды сыргась кудов.
       – Кар-р-р! – карнозевсь варакась чувто прясто, – автень кургот! Мезеяк а тейнемс эряви ансяк сестэ, зярдо вере озадо аштят!




 
матедевсь.

«Важодтяно эйкакштнэнь туртов»

       Ки чиресэ, лёмонть песэ,
       А васоло Ратор лейденть,
       Лисьмаприне чувозь тесэ,
       Эйдень сельмекс цитни-пейди.
       Яки ведень кис веленек
       Лисьмапрянтень пингем перть:
       Шумбрачи кази сон тенек,
       Симди цёрат ды тейтерть.
       Цяпор тикшень тантей чинесь
       Варманть мельга васов срады,
       Свал ведьсэнзэ лисьмапринесь
       Пазонь вий седейзэм кады.
       Тей симеме чийнинь кепе,
       Кастымим шумбра ломанекс.
       Пря песэнзэ касыть лепеть,
       Секс ведезэ кельме, ванькс.
       Ацазь кевсэ потмаксозо,
       Ваномсто неяви чачк.
       Эрьва чистэ сакшнан тозо,
       Лемганть чиян экшень пачк.
       Ваксканзо ломанть а ютыть.
       Симемаст ведесь явавтсы.
       Керень кече ваксот путозь,
       Амольдямс тозонь чопавтьсы.
       Лисьмань ведьсэ модань виесь,
       Чамат неяви тонть ведьстэ.
       Прась менельстэ эрексиясь
       Минек лецямс пазонть
        кедьстэ.
       Чави-токны седеезэ,
       А кадсы ёмамо ойметь:
       Эрьва тунда капшан тезэ,
       Ванськавтомо сайса
        коймем.
       Апак лотксе сон бульдерьди,
       Симемс ломантнень терди.


«Важодтяно эйкакштнэнь туртов»

       Те иестэнть «Крошка» театрань ды кинонь эйкакшонь центрантень топодить 15 иеть. Зняро шка театрась кенярдовты эсензэ вишка инжетнень мельс туиця евкссо, спектаклясо. Ды аволь ансяк эйкакштнэнь, сынст тетяст-авасткак. Ульнесть театрасо стакачитькак. Иетне молить… Полавтовить ваныцятне, полавтовить налксицятнеяк.
       Аволь умок театранть сценанзо лангсо невтезель «Сияжар» спектаклясь, конась уш аволь весть казевкшнесь дипломсо. «Крошканть» эрямодонзо ды «Сияжаронть» сцена лангс путоманзо кувалма кортнинек театрань главной режиссеронть Г.Ю.Чернышева марто.
       – Галина Юрьевна, зярдо панжозель «Крошка» театрась?
       – Те иестэнть театрантень топодить 15 иеть. Сон ней лемдяви «Городской детский центр театра и кино «Крошка» культурань муниципальной учреждениякс. Кандовтано Саранскоень социальной политикань департаментэнтень, конанть прявтсо важоди Г.А.Лотванова. Течинь чине, зярдо пек аламо ломанть сакшныть кинонь ваномо, а меельце шкатнестэ а сакшныть овсе, минь арсетяно теемс сонзэ някань ошонь театракс.
       – Евтнеде аламодо коллективденк.
       – Коллективенек аволь пек покш. Зярыя иеть театранть прявтокс важоди Р.М.Крайнова. Главной художникекс – Г.В.Хрупало. Истя жо улить вейксэ налксицянок ды зярыя лездыцят.
       – Театрась – эйкакшонь, а зяро иест налксицятнень? Улить ютксост истят, конатне важодить уш умок?        – Улить истяткак. Вана С.Л.Хрупало. Налкси сцена лангсо 15 иеть, театрань панжомань васенце читнестэ саезь. Истя жо О.Е.Андронова важоди малав 12 иеть. Сехте од налксицятненень – 20 иеть, эйстэдест кавто.
        – А кода аштить тевтне спектаклянь ваныцятнень марто?
       – Р.М.Крайновань самонзо марто эрямось театрасонть седе вадрялгадсь. Сон, кода прявт, эсь тевензэ содыця ломань, вадря организатор, ламодо арсиця. Ютазь сезононть лангс ванозь, мерян, залось пешкелесь пеледензэ ламос, эрсекшнить мик аншлагткак. Важодемс савсь натой июнень васенце чис, куш пекставкшнотано седе икеле. Мартсто минь нолдынек «Каткань кудо» спектакля, путыцясь – театрань налксицясь О.Е.Андронова. Те иень меельце спектаклякс (конанть минь невтинек сцена лангсо театрань пекстамонь чистэнть) ульнесь Андерсононь евксонзо коряс «Дюймовочкась». Ваныцятнеде сакшность пек ламо.
       – Кодат спектаклят тынь эште путниде мокшэрзянь раськень евкстнэнь, легендатнень коряс.
       – Эйстэдест, видьстэ меремс, ульнесть зярыя. Ансяк а стувтовиксэкс кадовсть кавтотне. Зярдо мон тесэ эште эзинь важоде, путозель «Настушка» спектаклясь. Сонзэ марто ардтнесть Рязань ошов «Рязанские смотрины» някань театрань международной фестивалев. Тосо те спектаклясь казезель «За самый фольклорно-красочный спектакль» дипломсо. Истя жо аволь пек умок путозель «Сияжар» спектаклясь. Сонзэ невтинек 2007 иень январень 19 чистэ. Ды зярдо мартонь 27 чистэ ютакшнось сехте паро спектаклятнень ванномась, конась алтазель Театрань чинтень, «Крошкантень» максозель «За художественное создание спектакля» премиясь. Казизе сонзэ Культурань министрась П.Н.Тултаев.
       – Галина Юрьевна, улить эште кодаткак мельть-арсемат нолдамс раськень теманть коряс спектаклят сыця шкатнестэ?
       – Кода эно, улить. Ды зярыя… Ансяк теде мон евтнеме а карман, кода ломантне кортыть: икелепелев, келя, иля кортне, а то теветь а лисить. Монгак сынст ладсо арсян.
       – Мекс Тынь кочкакшнынк «Сияжаронть», мейсэ сон явовтызе меленк?
       – Васняяк, мекс минь пшкадинек раськень темантень? Эдь эрямс Мордовиясо ды а путомс мель раськень койтненень-кирдатненень, ютазентень, арсян, а виде. Кувать аштесь сельмем икеле В.Радаевень «Сияжар» книгазо… Ды, зярдо сонзэ ловныя, монень вечкевсь сюжетэзэ. А бути улемс видекс – сехте пек тень вечкевсь темась: рузонь ды эрзянь раськетнень ютксо ояксчись монголо-татартнэнь каршо тюремстэ. Сась мель невтемс сонзэ сцена лангсо. Ансяк те пек стакаль, эдь произведениясь покш ды киртямс сцена лангсо невтеманть туртов а шожда. Варчинь теемс сценарий, теньсэ тень лездакшнось 19 гимназиянь рузонь литературань тонавтыцясь, Саранскоень од сермадыцясь Ольга Гонцова. Тердинек лездамо Архитектурной факультетэнь профессоронть, Мордовиянь содавикс художникенть А.С.Алешкинэнь. «Сияжаронть» путомсто сон важодсь кода художник-сценограф ды художник-консультант. Спектаклянть теемстэ покш тарка саи музыкась. Тень кувалт тенек лездась минек содавикс од музыкантось Александр Курин. Куш Саша важоди, истя меремс, неень шкань джазонь енкссонть, ялатеке сон парсте маштсь невтемс раськень седикелень музыканть сюпавчинзэ.
       – Минек республикадо башка «Сияжарось» невтезель косояк лиясо?
       – Те спектаклясь, невтезель лия республикань зярыя сцена лангсо. Васняяк, арсинек невтемс сонзэ сеть енкстнэсэ, косо эрить эрзят. Истямо мель марто февральстэ пачколинек Пензав. Тосо пек парсте вастымизь: весе мельспаросо ванызь спектаклянок ды евтасть ламо лембе валт. Те макссь весе налксицятнень туртов покш вий. Кирвазтсь тол седейсэст невтнемс «Сияжаронть» седе товгак. Пензасто минь ускинек зярыя дипломт. Вана аволь пек умок ардтнинек «Сияжаронть» марто Коми Республикань Сыктывкар ошов «Ён дзирд» («Божественная искорка») эйкакшонь ды од ломанень туртов театрань колчинь VI международной финно-угрань фестивалев.
       – Галина Юрьевна, вана прядовсь театрань сезонось, налксицятне тусть оймсеме. Зярдо жо ней кенярдовтсынк вишка ваныцятнень од евкссо?
       – Кода свал, од сезонтнэ панжовить октябрянь меельце читнестэ. Лиясто ноябрястояк, кой-кодат стакачинь коряс. Васенцесь эйстэст – тейнемат някат ды од оршамопельть. Ансяк минь те иестэнть арсетяно панжовомс шкастонзо. Содасынек: эйсэнек учить вишка оянок. Кевкстнить, зярдо, келя, невтьсынек од евкстнэнь? Лиясто аватне сынсь сакшныть малазонок ды евтыть покш сюкпря истямо алкуксонь кенярксонть кис. Тень кувалма карматано седе товгак мельспаросо важодеме ды налксеме. Сакшнодо тенек инжекс!

Просмотров: 827 | Добавил: erzyany-rasyke | Рейтинг: 5.0/1 |
Всего комментариев: 0
Имя *:
Email *:
Код *:
» Форма входа

» Календарь новостей
«  Октябрь-Ожоков 2007  »
ПнВтСрЧтПтСбВс
1234567
891011121314
15161718192021
22232425262728
293031

» Поиск

» Друзья сайта

» Статистика


Copyright MyCorp © 2017
Сделать бесплатный сайт с uCoz