|
Саранскоесь, Мордовия Республикань парявтош. Политической, экономической, научной ды культурной центра. Покшолмазо 71,5 км2. Эрицятнеде 311 тыща ломанть (2002 ие). Москов оштонть ашти 642 километрань тарка. Куйбышевской чугункань кинь станция (ули Аэропорт). Сюлми автомобильной китнень. Оштнэ-побратимтнэ – Ботевградось (Болгария), Гожув-Велькопольски ды Серадз (Польша).
|
|
|
|
Старая карта г. Саранска |
Новая карта г. Саранска |
(Панжозь 1641 иестэ кода Атемарской тешксэнть лангсо острогось). Лемесь канды гидронимической смусть: ошось кепедевсь Саранканть чиресэ (кезэрень эрзянь-мокшонь кельтнесэ – сар, сара , «явовома тарка, леень прамо тарка), кона прась маласо Инсарс. 17-18 пингетнестэ Саранскоесь эрявсь военной тевтнесэ. Крепостьсэнть ульнесть служебной кудот, воеводонь кардаз, оружиянь ды салонь утомт, чувтонь аволь покш церьковат (ней Советской площадень таркась). Сонзэ перька эрясть казакт (вантано «Казачетсвась»), стрелецт, пушкарть. Военной тевсэнть эрявиксчинзэ ёмавтомадо мейле, Саранскоесь теевсь микшнемань-ремесленникень ошокс. Эрьва иестэ тесэ ютавтневсть покш базарт ды ярмункат.
Саранскоесь микшнемань тевтнесэ сюлмавозь Казань, Москов, Н.Новгород, Ярославль, Рязань, Саратов, Тамбов оштнень, Прикаспиянть ды Причерноморьянть марто. 1651 иестэ кармась улеме Саранской уездэнь центракс, 1770 иетнень прядовомс тевтнень ветясть воеводтнэ. (1708 иестэ саезь, совась Азовской, мейле Казанской губерниятнес. 1670 иестэ ульнесь С.Т.Разинэнь отрядтнэнь неждямо пунктокс. Повстанецтнэнь ютксо тюрсть Саранскоень эрицятне Василий Дьяволков, Яков Никитинский, толмачось Асай Карачурин, колодникесь Фёдор Сидоров. Саранскоень эрицятне яксесть Петр I марто 1695-96 иень Азовской походтнэс. 1774 иень медьковсто ошонь эрицятне лездасть Е.И.Пугачёвнень, кие совсесь ошонтень). 1780 иестэ Саранскоентень максозь уездэнь ошонь статус. 1781 иестэ кемекставсь сонзэ гербезэ. 1801 иестэ Саранскоесь совась Пензенской губернияс. Ошонь ды уездэнь эрицятне воевасть 1812 иень Отечественной войнасонть. Тесэ кемекставсь народонь ополчения, пурназь ярмакт воинской частень кирдемс.
Саранскойсэ промышленностесь кармась виевгадомо 19 пингестэнть, сехте бойкасто те тевесь мольсь крепостной праванть лоткавтомадо мейле. 1890 иетнестэ роботасть кшнинь теемань, кирьпецень, сапонень пидемань, оень лепштямонь заводт, ракшань печкема таркат, карьксэнь-пиксэнь понамонь ды махоркань фабрикат. Экономиканть, торговлянть, строительстванть, предпринимательстванть виевгадомаст пек седе бойкалгавтызе 1893 иестэ Саранскоенть чачк чугункань кинь ветямось, финансово-коммерческой учреждениянь, страховой агентстватнень, ошонь общественной банконь, вейке-вейкенень кредитэнь максомань обществанть, ломбардонть ды лия-мезень панжомась. 20-це пингенть ушодовомсто строявсь электростанция, бурязь зярыя артезианской скважинат, роботасть почтась, телеграфось, телефононь станциясь, 2 больницят, 2 аптекат. Ошсонть роботасть Саранскоень живописаень школась, народнорй библиотекась (панжицязо Е.Л.Токарева), садось, конанень максозель А.С.Пушкинэнь лемезэ сонзэ чачомачистэнзэ 100 иетнень топодемаст кувалма, прянь ветямонь искусстванть вечкицянь Саранскоень обществась, «Художестве нный» кинотеатрась, косо седясь симфонической оркестра, братнэнь Н.А. ды И.А.Сыромятниковтнень, Г.И.Кожевниковонь типографиясь, лиссть «Мужик» ды «Саранские вести» газетатне. Ошсонть тевтнень ветясь ошонь думась ды ошонь управась. Саранскойсэ промышленностенть, микшнеманть, строительстванть виевгавтомасо покш лезкс кандсь купечествась (М.П.Коровин, И.Л.Коротков, Кубанцевтне, Никитинтнэ, Сыромятниковтне, Фалилеевтне, Цинговатовтне ды лият). Эрьва кодат иетнестэ Саранскоев сакшность Россиянь ды омбо масторонь содавикс учёнойть, писательть ды лият.
Октябрьской революциядо мейле Саранскойсэ, кода Мордовиянь лия оштнесэяк, кемекставсь советской власть. 1918 иестэ организационной промкссонть теезь РСДРП-нь Саранской комитет. 1928 иестэ саезь Саранскоесь – Мордовской округонь, 1930 – Мордовской Автономной областень центра, 1934 иестэ саезь – Мордовской Автономной Советской Социалистической Республикань прявтош. Пек виевгадсь промышленной, гражданской, коммуникационной строительствась; трудовой коллективтнесэ ветявсь социалистической пелькстамось, ударничествась, стахановской движениясь. 1927 иестэ саезь 1940 иес промышленной продукциянь нолдамось покшолгадсь 50 ламоксть. Виевгадсть здравоохранениясь, образованиясь, печатесь, радиось, театрась, кинопрокатось, художественной самодеятельностесь, спортось. Ине Отечественной войнань иетнестэ (1941-1945) Саранскоень предприятиятне нолдасть армиянть туртов боеприпаст, оршамо-карсемапельть, ярсамопельть, транспортт. Саранскоень 17 тыщат эрицятнестэ, кить тердезельть фронтов, 8 ламо тыщат эзть велявто. Бойсэ изнявкстнэнь ды мездеяк а пелеманть кис Саранскоень 5 цёратненень – В.Н.Бобковнень, П.И.Орловнень (куломадо мейле), К.А.Карачковнень, С.А.Полежаевнень, В.И.Стрельченконень – максозь Советской Союзонь Героень лемть. Войнадо мейлень иетнестэ ошсонть кепедевсть промышленностень од отраслят: электротехнической, машиностроительной (вантано «Машиностроениясь ды металлообработкась»), медицинской, пищевой, строительной материалонь промышленностень, нолдазь 2 № ТЭЦ-сь. 1970-80-це иетнестэ Саранскоесь теевсь неень шкань индустриальной центракс. Малав 60 промышленной предприятият совасть масторонь народнохозяйственной комплексэнтень. Саранскоень предприятиянь продукциясь – электролампатне, выпрямительтне, кабелесь, автосамосвалтнэ, экскаватортнэ, солавтозь металлось, резинотехнической изделиятне, антибиотиктне ды седе тов – ильтявсть мирэнь 60 масторов. Ветявсь газ эрямонь кудотнес ды предприятиятнес, ушодовсь троллейбустнэнь якамось, одкстомтовсь транспортось, радиось, телефононь связесь. Панжозь вузт, НИИ-ть, техникумт, ПТУ-т, школат, больницят, лавкат, рынкат. Кепедезь эрямонь од микрорайонт: «2 № ТЭЦ-сь», «Светотехникась», «Юго-Западось», «Химмашось». Ошсонть строязь 250 ламо ульцят государственной ды башка эрицятнень кудост марто.
Саранскоень народной хозяйстванть ламо отраслянь производственной структуразо. Тесэ вейсэндязь республикань 2/3 индустриальной виесь, 60 ламо покш ды средней промышленной предприятият.
Саранскоень здравоохранениянь системась кармась кемекставомо 19 пингестэнть. Сестэ роботась 1 больниця 14 ломаньс. Врачонь лезкесэнть максть 2 врачт ды чачтовтыця бабинесь. 20 пингенть ушодовомсто Саранскойсэ важодсть врачтне Г.П.Петерсон, И.И.Кубанцев, М.А.Березин, Н.И.Соколов, А.А.Морозов, П.А.Кондрашов. 1980-це иетнень куншкавидентень ошсонть роботасть 8 больницят, 21 поликлиника. 2002 иестэ Саранскойсэ ульнесть 15 больницят 4755 ломаньс: Мордовской республиканской клинической больницясь, Республиканской офтальмологической больницясь, Мордовской республиканской психиатрической больницясь, Ошонь инфекционной клинической больницясь, Бойкасто медицинской лезксэнь максомань ошонь клинической больницясь, Ошонь 4 № клинической больницясь, Ошонь 13 № больницясь, Ошонь эйкакшонь клинической больницясь, Шумбрачинть кемекстыця республиканской больницясь, Войнань ветерантнэнь туртов республиканской госпиталесь ды лият; 960 ломаньс 7 диспансерт: Республиканской врачебно-физкультурной диспансерэсь, Республиканской кожно-венерологической диспансерэсь, Республиканской наркологической диспансерэсь, Республиканской онкологической диспансерэсь, Республиканской противотуберкулёзной диспансерэсь, Республиканской психоневрологической диспансерэсь, ошонь противотуберкулёзной диспансерэсь; 22 абулаторно-поликлинической учрежденият, Республиканской диагностической центрась; СПИД-нь республиканской центрась; врачонь 16 здравпункт; 10 фельдшерско-акушерской пункт; МР-сэ ды Саранскойсэ государственной санитарно-эпидемиологической надзоронь центрась; Саранск ошонь дезстанциясь; Аэроионотерапиянь центрась; Медицинской косметологиянь центрась; «Саранский» санаториясь (вантано «Водогрязелечебницатне»), промышленной предприятиянь ды тонавтнемань заведениянь санаториятне-профилакториятне. Важодсть эрьва кодамо специальностень 4034 врачть, 10559 средней медицинской важодицят.
Саранскойсэ образованиянь ламо учрежденеият. 18 пингестэнть панжовсть кудонь васенце школатне. 20 пингенть ушодовомсто кармасть панжтнеме тонавтнемань светской заведеният. Сындест ульнесть: Саранскоень реальной училищась, Тейтерь-авань ды цёрань начальной приходской училищатне, 3 ЦПШ-т, Саранск ошонь тейтерь-авань гимназиясь, Саранскоень свалшканеь педагогической курстнэ, Саранскоень тонавтыцянь семинариясь ды лият. Просвещениянть виевгавтомасо лездасть тонавтыцянь династиятне Дельдингтнень, Масловскийтнень, Токаревтнень, Обуховтнень, Гридинтнэнь, Цинговатовтнень. 1980-це иетнень куншкавидстэ Саранскойсэ роботасть 47 общеобразовательной школат, 7 техникумт. 2001/02 тонавтнема иестэнть Саранскойсэ лововсть 62 общеобразовательной школат (39579 тонавтницят), 5 гимназият, 6 лицейть, 9 школат, косо домкасто тонавтневить эрьва кодат предметнэ; 14 ПУ-т, 8 средней специальной учебной заведеният, Саранскоень музыкальной училищась, Саранскоень художественной училищась, Саранскоень кооперативной техникумось. Тосо тонавтомань тевенть топавтсть 1 тыщадо ламо тонавтыцят, сынст ютксто наукань 20 кандидатт.
Саранскоесь – студентэнь ош. Тесэ 6 вузт: Мордовской государственной университетэсь, М.Е.Евсевьев лемсэ Мордовской государственной педагогической институтось, Саранскоень кооперативной институтось, Неень шкань гуманитарной университетэнь Саранскоень филиалось, Мордовской гуманитарной институтось, Государственной службань Волго-Вятской академиянь филиалось (ванодо «Высшей учебной заведениятне»). 2001/02 тонавтнема иестэнть вузтнэсэ важодсть 2 тыщадо лвамо тонавтыцят, сынст ютксто 200 докторт ды 1,2 тыщадо ламо наукань кандидатт. Фундаментальной ды прикладной тонавтнематнень ветясть вузтнэ, Гуманитарной наукань научно-исследовательской институтось, Регионологиянь научно-исследовательской институтось, А.Н.Лодыгин лемсэ валдонь источникень Всероссийской научно-исследовательской проектно-конструкторской ды технологической институтось (вантано «Лисма – ВНИИИС»), Силовой электроникань научно-исследовательской институтось, Велень хозяйствань Мордовской научно-исследовательской институтось ды лият. Кадратнень ёрокчист кастыть ды одс анокстыть Мордовской государственной университетэсь, Агробизнесэнь кадратнень одс анокстамонь Мордовской институтось, Образованиянь Мордовской республиканской институтось.
2002 иестэ ошсонть школадо икеле трямонть-кастоманть ветясть эйкакшонь 73 дошкольной образовательной учрежденият, сынст ютксто 65 муниципальнойть ды 8 ведомственнойть (весемезэ 11,2 тыща эйкакшт). 36 муниципальной дошкольной образовательной учреждениятнесэ ульнесть 68 логопедической группат (950 эйкакшт). Саранскойсэ 47 библиотекат, косо книгань фондось 2078,7 тыща экземплярт (Национальной библиотекась, Эйкакшонь Мордовской республиканской библиотекась ды лият); 22 клубт ды Культурань кудот (Культурань республиканской дворецэсь, Саранскоень Культурань центрась, Саранскоень Ленинской райононь Культурань кудось, Эйкакшонь творчествань дворецэсь ды лият); 3 музейть (Мордовской республиканской вейсэндявозь краеведческой музеесь, Изобразительной искусствань Мордовской республиканской музеесь, 1941-45 иень военной ды трудовой подвигень мемориальной музеесь, сындест зярыя роботыть заводтнэсэ, школатнесэ, университетнэсэ ды педагогической институтсо (вантано «Музей, Раськень музей, Мордовской университетэнь музейтне»); 4 профессиональной театрат: Рузонь государственной драматической театрась, Государственной музыкальной театрась, Мордовской государственной национальной театрась, Някань государственной театрась, театрань ды кинонь ошонь эйкакшонь «Крошка» центрась, Мордовской государственной филармониясь, «Мордовия» государственной телевизионной ды радиовещательной компаниясь, Государственной камерной хорось, Саранск ошонь Рузонь народной инструментэнь оркестрась, Саранск ошонь скрипачень ансамблясь, «Умарина», «Келу», «Торама» ансамлятне, моронь «Росичи» театрась ды лият; «Спортонь дворецэсь», «Светотехника» стадионось, спортзалт, теннисэнь кортт (вантано «Теннис»), соксонь базат. Нолдавсть 12 журналт, сындест 2 эйкакшонь, 40 газетат, сынст ютксто 10 многотиражной газетат. Роботасть 2 издательстват (Мордовской книжной издательствась, Мордовской университетэнь издательствась).
Саранскойсэ ошонь кепедемань лувось. 17 пингень омбоце пельксстэнть – 18 пингенть куншкавидстэ – «крепость – микшнемань 2 таркат – посад». Саранка леень керш сэрей берексонть кепедезель башня марто прямоугольной чувтонь крепость. Саранканть кувалт ульнесь крепостной вал, башнянзо вансть Чивалгома ды Чилисема ёнов (Инзерской острогонть видс). Микшнемань таркась ульнесь крепостеденть пелеве ёно, сонзэ мельга 2 свободат, планировкась мольсь мельга-мельцек. 1660 иетнестэ саезь кармасть кепедевеме кудот Саранкань вить берексонть, 2 од свободатнень ды крепостенть ютксо теевсь микшнемань площадь. 17-18 пингетнестэ кепедезь Иоанн-Богословской, Христорождественской, Троицкой, Колмо святителень (1765; борокко; ней МРОКМ) церьковатне, «Пугачёвонь палаткась» (1765).
1785 иень генпланонь юрось – квартал ды площадь марто виде ульцянь кемекстамось. Саранскоенть перька главной композициянтень паралльна версе терассанть тёкшсо кемекставсь ошонь куншкавидесь – Базаронь ульцясь (ней Советской), козо совавтовсть Базаронь ды Соборной площадтне, кевстэ кепедезь соборной Спасской церьковась (17 пингенть прядовомась), Ильинской монастыресь (18 пингенть прядовомась), Казанско-Богородицкой монастыресь (18 пингесь). 19 пингестэнть строязь-мазылгавтозь Успенской, Яроморочной, Привокзальной площадтне, садось, паркось, явозь промышленной территориясь – Заводской ульцясь (ней Робочей). 1872 иень генпланонть коряс покшолгавтозель ошонь площадесь, кемекставсь обед ёнксонь планось, келейгавтозь ды мазылгавтозь куншкавидесь, кепедезь кевень кудот Базаронь, Троицкой, Заводской ульцятнесэ. 19-20 пингенть ушодовомсто кпедезь уездной властень кудотне (А.Д.Захаровонь «образцовой» проектэсь, 1816; классицизмась), тюрьмань замокось (1840; классицизмась), Святителенть Николаень церьковась (рузонь од лувось), тонавтыцянь семинариясь (1915; проектэсь П.Бенфельдэнь; ней ошонь администрациясь), реальной училищась (1912; ней Мордовской университетэнь корпусось), утом марто винань заводось (1901), военной казарматне (1914). 19 пингенть прядовомантень кемекставсть ошонь панораматне, Посопсто ды Саранкасто саезь пек парсте неявсть виде колокольнятне ды общественной покш зданиятне, сюлмавсть цёрань Иоанно-Богословской монастыренть марто. 20 пингенть куншкавидс Саранскойсэ сехте ламо кудотне ульнесть чувтонь.
1930-60-це иетнестэ администрационной од тевтнень пингстэ сонзэ чачозо пек лиякстомсь. 1930-це иетнень омбоце пельксстэнть общественной зданиятнень – Советэнь Кудонть (архитекторось Н.А.Меерзон), почтамтонть ды Центральной гостиницанть (П.А.Рубан), комвузонть, республиканской больницянть (И.И.Плетнёв) ды лия-мезенть строямсто ушодовсь центранть одкстомтомась. 1939 иень Генпланось («Гипрогор» ленинградской инеститутось) кемекстызе эрямокудонь таркатнень ды промышленностень территориятнень. Войнадо мейлень иетнестэ («Гипрогор» московской институтось) – тешкстазь ошонть касомань ёнкстнэ неень шкасто строямонь юронть ловозь. Мазылгавтозь центрась, пелеве-чивалгома ды обед ёнкстнэсэ теевсть промышленной зонат, ушодовсь пелеве-чилисема, обед-чилисема ды пелеве-чилисема ёно эрямонь од районтнэнь кепедемась.
1950-80-це иетнестэ одкстомтозельть главной ульцятне – В.И.Ленинэнь проспектэсь, Советской, Коммунистической, Пролетарской ды Советской, Изнямонь, Театральной, Коммунистической, Университетской, Профсоюзной площадтне. Тесэ панжозь административной, тонавтнемань, микшнемань ды лия учрежденият. Неть иетнестэ строязь истят общественной зданият: Союзонь кудось (1957, С.О.Левков), музыкально-драматической театрась (1961, М.С.Гельфер), Профсоюзонь Культурань дворецэсь (1975), МРМИИ (1976, В.И.Борисов, В.И.Сологуб), редакционно-издательской комплексэсь (1983, В.Н.Гусевский, В.В.Олифер), КПСС-нь ОК-сь (1987, Г.Г.Исакович), «Мордовгражданпроект» ды «Мордовавтодор» институтнэ (1987, Е.Н.Филимонов), 1941-455 иень военной ды трудовой подвигень мемориальной музеесь (1995); памятниктне: В.И.Лениннэнь, стратонавтнэнень, А.И.Полежаевнень, Х.Ботевнень, Пугачёвнень ды повстанецтнэнень ды лият (вантано «Скульптура»). 1989 иень Генпланонть коряс (В.И.Ванчугов, Л.М.Резвякова, «Гипрогор» московской институтось), тешкстазь покшолгавтомс ошонь куншкавиденть Инсаронтень – обед ёнов, одкстомтовсь транспортонть адтнемась, велувсо кепедевсть эрямонь 4 районт (сехте ламо вейкеть 5-9 этажсо кудот) общественной центра марто, кемекставсь парконь пингсэсь, мезесь яви ошонть Саранкань поймаванть.
1990-це иетнестэ – 2000-це иетнень ушодовомсто кепедезь Мордовской таможнясь (1997, В.В.Годунов, С.П.Ходнев, С.Н.Павлов, Е.В.Ходнева), «Мордовпромстройбанкось» (1999, Н.Н.Абдуллин, Филимонов), Коммунистической ульцясо коммерческо-деловой компексэсь (2000, Филимонов, А.Р.Шафеев), 12 № гимназиясь (2001, Ходнев, Павлов, В.А.Бродовский), Финансонь кудось (2004, Ходнев, Бродовский, Ходнева), Войнань ветерантнэнь туртов республиканской госпиталесь (2002, Бродовский), Советской ульцясо А.Невскиень часовнясь (2002, В.И.Бабаков), Фантантнэстэ валгома таркасонть Пушкиннэнь памятникесь (2002, скульпторось Н.М.Филатов, архитектортнэ Ф.П.Кильдюшкин, Ходнев, Н.В.Трибушинин); одкстомтозь кудотне: МРМИИ-нь (2002, Ходнев, Бродовский), «Спортонь дворецэсь» (2002, Бродовский, Ходнев).
Пелеве-Чивалгома ёнксонтень совить: Ленинской районось. Теевсь 1972 иестэ. 1985 иестэ сонзэ эйс совить центрась ды Саранканть томбале ошонь обед ды обед-чивалгома ёнкстнэ. Покшолмазо 250 км.2, эрицянзо 114 тыщат ломанть (2002). Тесэ – МР-нь Прявтонть резиденциязо, республикань исполнительной властень (вантано «Республикань кудось») ды законодательной властень (вантано «Государственной Собраниясь») органтнэ. Главной ульцятне: Советской, Большевистской, Пролетарской, Ботевградской, Коммунистической, Л.Н.Толстоень, Полежаевень, Ленинэнь проспектэсь, Октябрянь 550 иетнень проспектэсь. Промышленной виенть кемекстыть эрьва кодамо отраслянь малав 30 покш предприятият. Роботыть Главпочтамтось, Мордовской университетэсь, 11 образовательной школат, 5 гимназият, 3 лицейть, 6 средней специальной учебной заведеният, 26 дошкольной учрежденият, 14 больницят ды диспансерт, 7 поликлиникат, 4 театрат, 6 музейть, 10 библиотекат, культурань ды оймсемань 2 паркт, «Спортонь дворец», физкультурно-шумбралгавтомань 3 комплекст, микшнемань 470 предприятият, 8 ранкат.
Пролетарской районось. Теезь 1972 иестэ. 1985 иестэ саезь зани ошонь пелеве-чивалгома ёнксонть. Покшолмазо 27 км.2, эрицятнестэ 94 тыщат ломанть (2002). Эрямонь сехте покш таркась – «Светотехникась». Главной ульцятне: Е.А.Веселовскоень, И.С.Коваленконь, А.С.Пушкинэнь, Изнямонь, Октябрянь 60 иень проспектэсь. Роботыть малав 20 промышленной предприятият, 12 общеобразовательной школат, гимназия, лицей, 6 ПУ-т, 19 дошкольной учрежденият, ДХШ, ДМШ, 5 библиотекат, Эйкакштнэнь мазычинть чарькодеме тонавтомань центра, эйкакшонь 7 клубт, больниця, 4 поликлиникат, физкультурно-шумбралгавтомань комплекс, микшнемань 127 предприятият, 2 рынкат.
Октябрьской районось. Теезь 1985 иестэ. Ашти ошонь пелеве, чилисема ды обед-чилисема ёнкстнэсэ. Покшолмазо 280 км.2, эрицятнеде 103 тыщат ломанть (2002), сындест 7 тыщат эрить велесэ. Райононтень совить: робочеень Зыкова поселкась, Луховкась, Николаевкась, Ялгась. Сехте ламо ломанть эрить: Посопсо, «2 № ТЭЦ-сэ», Ю.А.Гагарин лемсэ поселкасо, «Химмашсо», «Южный» поселкасо. Главной ульцятне: Волгоградской, Гожувской, Ленинградской, Энергетичкеской, А.В.Косаревень, И.А.Лихачёвонь, Октябрянь 70 иеть проспектэсь. Районсонть 19 промышленной предприятият, МР-нь ГУП-тне – «Тепличное», «Луховское», «Ялга», «1 Мая», ООО «Агрофирма «Николаевская», Учхозось, 2 К (Ф)Х-тне – «Кильдеев» ды «Роса». Трить сывелекс ракшат, потявтыть ловцо, кастыть эмежть. Роботыть ГТС-сь, М.Е.Евсевьев лемсэ МГПИ-сь, Саранской кооперативной институтось, чинь 24 общеобразовательной ды чокшнень 1 школа, колледж, 2 лицейть, 6 ДХШ-ть, ДМШ-ть ды искусствань школат, Эйкакшонь творчествань центра, 19 дошкольной учрежденият, 4 библиотекат, велесэ Культурань 9 кудот ды клубт, 4 больницят, 3 поликлиникат, микшнемань 104 предприятият. |
|
