коензэ-кирданзо. Сынст ютксо улить пек умонь койть, истя саемс, авапазнэнь
озномат, атятнень-покштятнень культось, лият раськень ды мирэнь-масторонь
озномань пелькст, конатнень эйстэ сехте ламо саезель христианствастонть.
Мокшэрзянь раськенть кстиндамось прядовсь ХVIII пингенть куншкасо, се
шкастонть мокшэрзятнень кармасть ловомо Кристоснэнь озныця раськекс. Тень
лангс апак вано, эряви меремс: христианствась совась мокшэрзятнень ёжос аволь
пек кеместэ, сынь неень шкас эрьва кодамо тувталонь коряс ванстызь эсест
седикелень койтнень-кирдатнень, кезэрень озноматнень.

Неть озноматне-койтне христианстванть коряс седе кеместэ сюлмавсть
мокшэрзятнень эрямочист марто, седе парсте, домкасто невтить мокшэрзянь
раськенть мелензэ, арсеманзо, сэредеманзо, ёрокчинзэ, сонзэ тарканзо лия
раськетнень ютксо, сонзэ нишанзо этносферасонть. Озномань ды мифологиянь
арсематнень историяст - ломатнень эрямочист. Сынст содазь седе парсте
чарькодеви аволь ансяк мокшэрзятнень эрямо пингест, содави весе уралонь келень
семиянть ды лия раськетнень эрямочисткак. Мокшэрзянь озноматне, койтне кандыть
лезэ весе мирэнь-масторонь озноматнень историянть сёрмадомсто. Сынст содамось
лезды чарькодемс кевкстематнень религиянть чачомадонзо-касомадонзо (озномань
арсематнень сюлмавксост эрямочинть марто, седикелень озномань форматне, вере
пазнэнь озноманть теемазо, озномань човорямось ды лият), сон ашти сюпав
канстокс уралонь келень раськетнень, икелеяк кона эрить Равонть чирева ды
Уралонть пандтнэнь ало, озномаст вейкетстямсто. Сынст озноматне-койтне пек
эрявить этнологиянь ды этносоциологиянь ламо ёнкснэнь чарькодемстэ. Алкукскак,
материалтнэнь ютксо, конатнень пурнынзе те кедьсёрмань авторось, улить кулят
авань буень вейсендявксто, сынст челькетне кемекставсть озноматнесэ-койтнесэ.

Мокшэрзянь кезэрень озноматнень ды мифологиянть тонавтнемстэ сехте икеле
вастоват пек ламо авань пазтнэнь марто: вирьсэ - Вирява (вирь + ава), модасо,
масторсо - Модава, Масторава (мода, мастор + ава), ведьсэ - Ведява (ведь +
ава), вармасо - Вармава (варма + ава), толсо - Толава (тол + ава), кудосо -
Кудава (кудо + ава) ды лият. Авань пазтнэнь вакссо улить пазт-атяткак: Вирятя
(вирь + атя), Модатя, Масторатя (мода, мастор + атя), Ведятя (ведь + атя),
Варматя (варма + атя), Толатя (тол + атя), Кудатя (кудо + атя) ды лият,
конатне лововить авань пазтнэнь мирдекс.

Омбоцекс лияксчикс, пазтнэ-атятне аштить аватнень мельга, сынст ролест авань
пазтнэнь коряс седе вишкине. Истя, эрьва кодамо озномасо, пазморосо, ёвкссо
прявксонь рольтнень налксить пазтнэ-аватне, сень шкасто, кода пазтнэ-атятне,
сынст мирдетне, аштить удало, экшсэ, сынст леместкак лецтневить ланга-прява,
аволь свал, конат-конатне ансяк арсевить.

Кода чарькоцтемс истямо тамашанть?
Те тамашась чарькодеви, снярдо минь карматано содамо пек умонь шкань койтнень,
конатнень юрост, корёност сюлмавозь авань-биень вейсендявксонть марто. Сонзэ
койтне путсть тешкс се шкань озноматнень ды илатнень лангс. Ёвтазь авань
пазтнэнь ловсть весемень кирдицякс-ванстыцякс. Нетне пазтнэнь лувсо арасель
вере пазось, арасельть сонзэ кедь ало аштиця пазт, кода эзь ульне азорксчи ды
кедь ало кирдема сынст ломатнень ютксо. Нетнень эсест ёнов молиця пазтнэнь
мокшэрзятне арсизь-теизь превсэст, эсь прясост, - а теевикс, иллюзиянь кондямо
мирэнь-масторонь виекс, конатне кандыть ламо зыян, снярдо ломантне а кармить
сынест мель путомо, озномо, канстонь кандомо, лиякс меремс, стувтсызь. Содазь,
мокшэрзятне свал учость пельдест парочи, секс сынь таркатнева, косо, эсь
коряст, эрясть-аштесть пазтнэ (вирьсэ, паксясо, лей чиресэ, кудосо, утомсо,
банясо, кардазсо, нешкепиресэ, калмолангсо) тейнекшнесть озкст, конатнень
ютавтомсто кантнекшнесть пазтнэнень канстт, тердекшнизь симеме-ярсамо,
кучнесть сыненст сюкпрят ды озномат.

Эсест кондямо пазтнэнень кемеманть а эряви ловомс мокшэрзятнень сехте васень
озномань формакс. Паряк, ульнесть седеяк икелень озномань формат, конатне
сюлмавозельть тотемизма марто. Истямо арсеманть коряс арась покш явома
ломантнень ды кильдеметнень ютксо, вейкетне велявтовить омбоцетнекс ды
мекевланк. Кода арсесть мокшэрзятне, ломанень ды кильдемень лангс молицятне
(ломанть-нармунть, ломанть-лишметь, ломанть-калт, ломанть-овтт, ломанть-гуйть,
ломанть-мекшеть), конань чачост кандовсть миненек фольклорсонть, эрясть
кезэрень пингстэ (мокшокс "кезоронь пинге"), пек умонь пингстэ (мокшокс "пяк
кунардонь пинге"), рузкс - "стародавний век", "древнейшее время".


Ю.А.Дырин -- Мастор нармунь


Кода неяви, тотемизмань вайгельтне марявить кона-кона ёвкстнэсэ. Истя,
варакантень мокшэрзянь ёвкстнэсэ мерсикшнить Варака патяй. Улить мокшэрзянь
ёвкст, конатнесэ ракшатне, примеркс, овто урьваксты тейтерь лангс ды,
мекевланк, лиси мирденень цера экшс. Мокшэрзянь моросонть ломанень ды овтонь
урьвакстомадо лецтневи овтонь масторось, кона ашти та-косо вирь потсо, козонь
ломать а якить, ды козонь овтось кандызе салазь тейтеренть, седе тов нинзэ:

Атяка овтось Катянь учизе,
Авака овтось Катянь сасызе.
Саекшнызь Катянь сынсест масторов,
Саекшнызь Катянь сынсест кудов-чив... (Эрзянь морот 1928: 123-124).


Овтонь семиясо Катя чачты эйкакшт овтонь-ломанень чачосо, важоди, пани прякат,
пиди поза ды мейле сы эсест велев мирдензэ марто, невтсы сонзэ
тетянстэнь-аванстэнь, алкуксчи, кудов а совавтсы, кадсы кардазов. Тесэ лелянзо
овтонть чавсызь. Катя сюды сынст секс, мекс сынь кадызь сонзэ мирдевтеме,
эйкакштнэнь - тиряка тетявтомо. Лия моросо авинесь сы тетянзо кудос кавто
эйкакш-овтолевкт марто, сынь сусконисызь тетянзо кильдеметнень (Эрзянь морот
1928: 157-160). Вейке авинесь мокшэрзянь ёвкссо лайши мирдензэ-овтонзо
кувалма, конатась чавовсь, кода лангозонзо прась чувто (Маскаев 1964: 261).

Не ёвкстнэсэ ды моротнесэ неяви пек умонь овтонь культось. Мокшэрзянь кезэрень
урьвакстомань койтнень лувсо покш тарка максови овтонь налксемантень: овтось
киштязь вети урьвакстыцянть лисьмапряс, лей чирес, киштемасонть невтни
эйкакшонь теема. Мокшэрзятнень ютксо сеедьстэ ёвтнить ёвксонть овтодо, кона
кандсь казне авантень сэредемадо пичкавтоманзо кис. Паксясо важодиця авантень
вирьстэ лиссь овто, авинесь тандадсь, капшазь кармась менеме эйстэнзэ. Овтось
стясь каршозонзо, невтизе икеле пильгензэ, конантень пезнась сярдо. Авантень
мезеяк эзь кадово, кода таргамс сярдонть, ваднемс сэредиця тарканть. Овтось
сюконязь тусь, курок кандсь медьте пешксе нешкепарь ды сюконязь мекев тусь
вирев (Мордовские народные сказки 1985: 24).

Мотивесь овтонть чавомадо нинзэ малавикстнэнь пельде чачсь седе мейле, кода
овтонь культось каладсь, кода овто экшс лисемась ды овтонь лангс урьвакстомась
лоткасть арсевеме уцяскакс, кода ломантне эзть карма пелеме тотемтнэде.
Овтодонть лоткасть арсеме теке умонь предкадо, сонзэ чавомась теевсь истямо
жо, кода лия ракшань чавомась. Седе од ёвкстнэсэ, моротнесэ овтось невтеви
аволь тотемкс, сон - пародояк паро каршо молиця (Маскаев 1964: 262-263).

Мокшэрзянь мифологиясо ломантне сеедьстэ эрить тотемонь чачосо, ветить эсест
биетнень, ёвтнить сышкадонть. Сынь, мерят, велявтнить удалов, ютазь шкатнев,
кода теевкшнить чувтокс, тикшекс, верьгизэкс, овтокс, идемкакс, мекшекс,
гуекс, истямо тамашань ломанекс, конанть ламо чачонзо (тикшень, ракшань,
нармунень). Тиринь масторонь вирьтне-лейтне - аволь ансяк таркат, косо моли
эрямось, сынь тевень теицят, ломантненень лездыцят. Пейзажось кеместэ сюлмазь
велень эрицятнень марто, сынст койтнень-кирдатнень марто. А чуросто кортамотне
молить тевтнеде, конатне ютакшность те ды тона велесэ, те ды тона пандонть,
чувтонть ало, леенть, виренть чиресэ. Седе талайчинь моротнесэ, ёвкстнэсэ
ломанесь прясто-пильгс сюлмазь перть-пельганзо аштиця флоранть ды фаунанть
марто, свал вешни сынст ютксто эстензэ лезэ. Ракшатне, нармунтне сонензэ
лездыть, сынь содыть салава теевиця тевде, якить-ливтнить те масторсто тона
масторов ды мекевланк.

Кода кемекстыть этнографиянь материалтнэ, ломантне аравтнесть эсь пряст сетне
объектнэнь малас, конататнень мелест сынь вансть. Истямо мелень ваномась
чачтась бажамот вейкетьстамс мартост, куш сынст пелькстнэнь (кенжест, пеест,
понаст, кедест) марто. Кода ломантне сынст токшесть, ванстасть, теке амулетт,
сынь учость пельдест парочи, арсесть, паряк сынсткак кармить улеме истят
ёнкст. Орта лангс овтонь кенжетнень понгавтнемстэ арсесть - неть кенжетне
кармить ванстомо сынст кильдеметнень апаро сельмеде, эрьва кодамо зыяндо.
Ванстыця виекс мокшэрзятне ловсть гуень ташто кеденть, сюро марто ракша
прятнень, лишмень пря пакартнень, конатнень сынь аравтнесть нешкепирева.

Мокшэрзянь ракшадо мифтнэнь юрост эйстэ вейкекс эряви ловомс вирень ёжосо
эрямочинть, снярдо ломантне эрсесть овтнэнь-верьгизтнэнь маласо. Кона-кона
ёвкстнэсэ неявить доместикациянь чельксткак. Истя, ёвксонть эйсэ верьгиздэ ды
сея левкстэ (сюжетесь 129) идем сеясь, конатанть вирьсэ свал покордась
верьгизэсь (овтось), туи тосто велев эрямо ломань ютксо (Мордовское народное
устно-поэтическое творчество 1975: 175).


Ю.А.Дырин -- Сярдо


Мокшэрзятне - умонь сокиця-видиця раське. А стяк сонзэ фольклорсонть ули
моронь покш пусмо, конась невти, кода кемекставсь сокамось-видемась, кода сон
кадынзе удалов ракшань ды нармунень леднеманть, калонь кундамонть, теке а пек
кемемачи тевтнень. Лейтмотивекс не моротнесэ-мифтнесэ - кардамс, сюдомс
овтнэнь-верьгизтнэнь, нармунтнень чавноманть, сынст пизэст калавтнеманть.
Ривезьтне, нумолтнэ, чинеметне, идемкатне, мацейтне пеняцить эсест эрямочинть
лангс. Неть моротнень персонажтнэде вейкесь - идемка (мацей, чинеме), конатань
каршо ашти охотник. Паро - берянь сон ломанесь, карми неевеме сестэ, зярдо сон
чавсы - а чавсы идемканть. Кона-кона моротнесэ идемкась - нармунень чачосо
тейтерь, конатанть сюдызе ававтозо улемс нармунекс мирденень лисемстэ.
Охотникесь сонзэ а чавсы, идемкась тееви авакс - сонзэ никс. Сеть моротнесэ,
косо оймевтеме ломанесь, конанть кудосо учить низэ ды эйкакшонзо, а кунсолы
нармуненть энялдоманзо, кадови семиявтомо, снярдо ледсы сонзэ. Кода сон сы
кудов, несынзе тесэ кулозь нинзэ ды эйкакшонзо, сестэ чарькоди, кодамо сон
покш зыянонь теиця (Paasonen 1938: 345-353).

Моротнесэ идемкадо ды охотникте маряви аволь ансяк оймевтеме ломанень сюдома.
Сынст эйсэ идемкась, васняяк, эрямонь максыця, мейле нармунь. Мокшэрзянь
мифсэнть ал лангсо аштиця идемканть чачозо канды уралонь мифологиянь умонь
челькст. Пек мазыть сонзэ толганзо, рунгозо, лиясто сон колдовазь ава, лиясто
- Верепазонть, Виряванть нармунезэ. Зярдо охотниктне идемканть чавсызь, сынь
абунгадыть виев вайгельдензэ, ламо верьдензэ ды толгадонзо:

...Мастор соркстась шумнедензэ,
Менель гайкстась вайгельдензэ,
Дутк-латк пешкедсть вернедензэ,
Мастор вельтявсь толгадонзо,
Менель пешкедсь пухкедензэ
(Евсевьев 1961: 254).

Истямо гиперболизациясь тердезь невтемс чавозь нармуненть аволь стяконь
чачонзо. "Яксарга" мокшонь моросонть идемкась (яксяргось) мери охотникентень:

...Тямак ляць, аля, тямак шав, цера!
Кодак шавсамак - аваце кулы,
Тон куду молят - рьвяце кулы,
Кенкшка сувамста иднятне кулыть.
Исце кулхцонда - яксяргть шавозе,
Кодак шавозе - аваняц кулось,
Куду молемста сонь рьвац кулось,
Ортава сувамста иднянза кулость.
Вай, вачкодсь цера кафта кяднянзон,
Пувордась цера кемонь суронзон
(Устно-поэтическое творчество мордовского народа 1963: 158).

Моротне-мифтне охотникте ды идемкадо невтить идемканть охотниктнэнь биень
тотемкс. Идемкась аволь ансяк нармунь, сон ломань, чавомс конанть биень койтне
а мерить. Сенде башка сон паро урьва, тагояк сон покорды се ломатнень, конатне
а сокить, а видить, ансяк леднить-чавныть. Кода идемкась тееви охотникенть
никс, сон мирдензэ марто туи велев, косо сынь эрить кшинь кастыцякс. Истя,
нетне моротне-мифтне эрявсть зярдо мокшэрзятнень эрямосо кармась кемекставомо
сокамось-видемась (Маскаев 1964: 228-229).

Сокамось-видемась мокшэрзянь фольклорсо аравтозь охотанть ды калонь кундамонть
каршо, сень марто вейсэ свал моли лишменть шнамозо, конавтомо
сокамось-видемась эзь арсеве. Лишмесь тееви сокамонь-видемань тешксэкс,
лишмевтеме сонзэ смустезэ ёмавтови. Сон изнясы карциганонть, конатась
мокшэрзянь моротнесэ-мифтнесэ ашти охотань тешксэкс, ды карми Мокшэрзянь
масторонть, сонзэ раськенть трицякс. Пелькстамотне лишменть ды карциганонть
юткова молить ярсамопельденть. Лишмесь ярсы тикшеде, сими ведьде, карциганось
прянзо шны секс, мекс ярсы лишмень сывельде ды сими лишмень верьде. Изницякс
не пелькстамотнесэ лиси се, конась седе курок пачкоди палманентень, килеенть
ваксс, конатне аштить моданть чиресэ, луганаронть куншкасо. Мокшэрзянь
фольклорсо ине килеесь (лиясто умаринась), теке карелонь ды финтнэнь рунатнесэ
ине тумось, лопасонзо тавады менеленть. Тумонть рунатнесэ керясызь, килеенть
мокшэрзянь мифтнесэ лазсы Верепазось ды чивалдомась мекев карми прамо моданть
лангс (Paasonen 1938: 34-36).

Весе не моротнесэ изницякс лиси лишмесь, конатась чии апак лотксе, сестэ кода
карциганось ливтямсто карми тюреме каршонзо ливтиця нармунтнень марто ды
кадови удалов.

Мокшэрзянь моротнень-мифтнэнь ютксо улить истяткак, конатнесэ кортамось моли
охотникенть тюремадо инегуенть марто. Инегуесь ашти палыця чувто прясо, ведь
куншкасо мукорь лангсо, веши охотникенть пельде лездамо, алты тень кисэ
теевемс тейтерекс ды лисемс сонзэ экшс (Paasonen 1938: 360-363). Тесэ мельс
леди идемкась се моротнестэ, конатнеде мольсь кортамось седе икеле. Ансяк
идезь гуесь казнень таркас карми идицянзо повамо, кучомо кудов модань сокамо.
Бути сон гуенть а кунсолосы, тонатась сонзэ повасы. Эрзянь моросонть "Андямо
церась вейкине" гуесь, конатанть Андямо идизе, пани сонзэ велев модань сокиця
атине вакска. Кода Андямо ютась сокицянть малава, сон маринзе лишменть
валонзо, конатнесэ ульнесь мурнема:

...Мон колоньгемень ие эринь,
Мои кемгавтово вашо аван,
Мон и то паксянть сокия,
Мон и то паксянть изыя.
Уш а тон кадыть роботат...
(Устно-поэтическое творчество мордовского народа 1963: 163).

Гуесь а повасы Андямонть, нолдасы кудов секс, мекс сон сови кардазов ды карми
кудонь-кардазонь пурнамо, "сюронь-салонь видеме".

Истяня, мокшэрзянь моротнесэ-мифтнесэ охотникте ды гуйде гуесь невтеви васня
кемиця ломанень манчицякс, седе тов сон ломаненть а чавсы, ансяк тандавтнесы;
гуенть арсемазо - теемс охотникенть эйстэ сокиця-видиця. Тень кувалт, гуесь не
моротнесэ аволь кодамо-бути ят, сон - превс путыця, ёроков ломань, ялга.
Кежейчинзэ сон невтни паронь арсезь (Paasonen 1938: 165-167; Мордовский
этнографический сборник 1910: 483-484; Маскаев 1964: 230-231). Се шкастонть,
зярдо чачсь те сюжетэсь, саемень хозяйстванть кармась полавтомо
сокамо-видемань хозяйствась.

Ламо ёвкссо, моросо Андямо аволь ансяк охотник, сон калонь кундыцяяк.
Тейтертне а молить полакс калонь кундыця цёранень, сынь пелить калонь ловажадо
куломадонть, наксадо калонь чинеде. Эрзянь моросонть "Чоподань-паронь
тейтересь" калонь кундыця од алясь терди тейтеренть полакс, тонатась а моли
экшезэнзэ, лиси полакс сюронь кастыця цёрантень, конань аштить "вере утомсо
товзюрот, ало утомсо розь сюрот" (Paasonen 1947: 49; Евсевьев 1963: 60-61).

Моротнесэ-мифтнесэ, ёвкстнесэ охотникте ды идемкадо, охотникте ды гуйде,
Ведявадо ды калонь кундыцядо сюдовить охотась ды калонь кундамось, конань
таркаст мокшэрзятнень эрямочисэст, мекшень кирдеманть вакссо, ялатеке ульнесь
аволь вишкине. Содазь, ХVIII пингес мокшэрзятне пандсть рузонь инязоронтень
каявкс кедьсэ, медьсэ, штасо, калсо. Моротне охотникте ды калонь кундыцядо
аволь сняро ёвтнить хозяйствадонть, кода невтить кавто карадо каршо аштиця
эрямо койть, ки седе паро эрямов.

Ю.А.Дырин -- Тантей удома


Минек эранть васенце тёжасто мокшэрзятне эрясть тетянь буень койсэ, авань
буень койтнеде кадовкшность ансяк кое-кодамо лецтнемат. Эрьва мокшэрзянь
племасо (зяро сынст эйстэ ульнесть, те шкас прок а содави) эрясть зярыя-бути
тетянь буеть, конань эйсэ ульнесть зярыя-бути покш тетянь семият. Тетянь
семиятнень прясо ульнесть кудатят (кудо + атя), тетянь буетнень прясо -
покштят (покш + атя), племань прясо - тюштят (тёкш + атя). Биесь ульнесь
велекс. А стяк неень шкас ламо эрзянь велетне пачтизь кезэрень лемест, конатне
саезельть буень покштянть лемстэ; те лементень сюлмавозель бие (буе) валось
(Атиньбие, Салманьбие, Иваньбие, Каканьбие, Кечень бие, Оржань бие, Орданьбуе,
Сырезьбуе, Орозбие, Баеньбуе, Кулязбуе, Таразбуе ды лият).

Тетянь биень койтнень теемась мольсь сестэ, зярдо вирьга, нарга пурнамонть,
калонь кундамонть ды охотанть шаштызь удалов сокамось-видемась, кильдемень
кастамось, ремеслатне. Кода каладсть авань биень койтне-кирдатне, цёрань
важодемась авань важодеманть коряс пек седе виевгадсь. Цёранть тарказо
эрямочинь койтнесэ кармась авань таркадо седе питнев. Неть шкатнестэ чачить ды
виевгадыть тетянь биесь, тетянь покш семиясь, весемсь таркасо тетянь
азорксчись: теевить истят илатне, кода авань саламось ды рамамось, ламо авань
лангс урьвакстомась, левиратось, покш тейтеренть вишка церыне экшс максомась
ды лиятне. Весе не подавтоматне эсть юта челькевтеме мокшэрзянь мифологиянть,
озноматнень, илатнень вакска.

Истя, мокшэрзянь мифтнесэ Литовадо - эрзянь тейтерьде, конань менелев салызе
Пурьгинепазось сонсензэ цёранстэнь никс, эряви неемс седикелень ташто коенть,
кода цёрась тукшнось эрямо нинзэ биев, синтрема од койсэ, зярдо, мекевланк,
урьванть кармасть саеме мирдензэ биес. Пурьгинепазось саласы Литовань велень
куросто, тундонь тейтерень морамо кужосто, нурямсто кепедьсы менелев лавсьсэ
ды сайсы урьвакс цёранзо экшс. Теке жо моронть лия вариантсо Литова соды
Пурьгинепазонть арсемадо, сон сонсь теде меркшнесь тейтерентень. Секс Литова а
лисни куров пиземе чистэ, кекшни пазодонть кудосо, латало. Нурямо, налксеме
ялганзо марто сон яки ансяк маней чистэ. Валдо чись Литованень неяви
Пурьгинепазонть эйстэ ванстовомакс. Пурьгинесь, ёндолось, цярахманось
салыцянть ялганзо. Сынст марто сон пансесынзе Литовань ялгатнень, коната марто
тейтересь налксесь морамо кужосо, кеверясь артозь алт велень куросо. Литовань
ялгатне а кармить содамо, ков сон юткстост ёмась. Те мифенть вариантнэсэ
тейтересь сонсь энялды Пурьгинепазонть нолдамс менельстэ пижень рисьмесэ сиянь
лавсь ды кепедемс сонзэ менелев.