Та-кода кавтолдозь ды а кемезь вастозель кулясь Самара областень “Кудо” ды Самара ошонь “Лисьмапря” вейсэндявкстнэнь панжомадо. Неть кевкстематне седеяк виевгавтсть кортамотнень сеть аладямотнеде, конат сыремсть тосонь “Масторава” ды “Лисьмапря” вейсэндявкстнэнь ютксо. Мезесь ульнесь тенень тувталокс, теде а карматано евтнеме. Зярдо а зярдо, кемтяно, неть вейсэндявкстнэ муить вейкине кель-вал ды сынст ютксо аладямотне улить изнязь. Но сень, кодат тевть топавтыть одс панжозь вейсэндявкстнэ ды мезе кенерсть тееме вейке иень перть, а кода кадомс апак редя. Тень теемс лездась тенек Самарасо вастовомась, кона алтазель “Кудо” ды “Лисьмапря” вейсэндявкстнэнь панжомсто саезь вейке иень топодемантень. Те вастовомантень тердезельть ломанть Мордовиястояк. Сынст юткс понгинь монгак.
Ды вана минь ки лангсотано. Минь – те: национальной политикань коряс МР-нь госкомитетэнь консультантось Т.Т.Ширманкина, МР-нь заслуженной артисткась А.Г.Атласова, баянсо седицясь В.Мартышкин ды мон.
Самарась, кода содатадо, аволь маласо. Ардомс тов сехте аламо 7 част. Ардомань перть превстэ эзь лисне арсемась: кода васолга уцяскась сравтынзе минек раськень ломантнень. Сындест пек ламо Самара енкссояк. Меельце ловоматнень коряс тосо ней эрить малав 90 тыщат эрзят ды мокшот. Икеле сындест седеяк ламольть – малав 120 тыщат. Ков ие кири-чуролгады минек раськесь. Ды те, маряви, мейсэяк а лоткавтови. Кода а янксемс ды а ацирьгалемс тень кувалма?
Некеть ежомарямотнень марто ардынек Самаравгак. Ды, видькстан, кодаяк эзинек арсе, тосо карми улеме истямо покш ды алкукс весе раськень вастовома. Киров лемсэ Культурань дворецэнь залсо, косо сон мольсь ды ков кельгить тыщадо ламо ломанть, умарентень а козоль прамс. Чаво тарка арасель вейкеяк, секс ламотненень савсь аштемс стядо. Савольть, келя, седеяк ламо, пачтиндерявольть теде радиова ды телевидениява. Ней, келя, ламот теде марясть кие косто понгсь.
Вастовоманть панжомадо икеле, кода свал, залсонть марявсть талномат. Талность аволь ансяк сонзэ ютавтыцятне, талность весе пурнавозтне. Аволь сеедьстэ сынь пурнавкшныть истямо ладсо, седеяк чуросто – эсест тевде-валдо кортамо, эрзянь-мокшонь моронь кунсоломо.
Седе а ков парсте арсезель вастовомань сценариесь. Сон сюлмазель эрзянь кезэрень коенть марто. Сонзэ коряс тунда, зярдо чись седе кувалгадыль, зярдо чипаесь седе манейгадыль ды лембелгадыль, ловось солыль, нармунтне ушодыльть пизэнь тееме, панжильть чувтонь лопатне, удомсто сыргозильть калтнэ ды весе унжатне, зярдо кудонь ракшатнень ливтилизь ваномо, эрзятне ютавтыльть покшчи. Сон алтавсь од толонь чачомантень. Се чистэнть чувильть латко, тозонь витильть толбандя, валылизь ведьсэ. Истямо ладсо мадстилизь ташто толонть. Тарказонзо, кавто коське тарадонь езазь, кирвазтильть од.
Тень эйстэ ушодозель вастовомаськак. Од толокс кармась улеме штатолонь валдось, кона свал лововсь апаро ды чопода зыянтнэнь паниця, ванськавтыця ды вейсэндиця виекс.
Васня – тевде кортамот. Мезе тейсть “Кудо” ды “Лисьмапря” вейсэндявкстнэ вейке иень перть, евтнесь сынст прявтось А.М.Кузнецов. Теезель аволь аламо. Майстэ ютавтсть ошонь чи. Самарань Загородной парксо, Куйбышевень площадьсэ се чистэнть гайгсть эрзянь морот (сынст морась Шенталасто “Пейделька” ансамблясь), весень каванясть эрзянь ярсамопельде. Пурнасть морыцянь од ансамбля, лемезэ “Килейне” (вейксэ ковтнень перть сон невтсь 9 концертт). Красноярской райононь Шилан велесэ, Волжский поселкасо панжсть “Кудо” вейсэндявксонь отделеният, Новокуйбышевск ошсо – мокшэрзянь национальной центра (“Маней чи”, прявтось С.В.Муругов), Богатовской, Борской, Алексеевской районтнэсэ – “Лисьмапря” вейсэндявкс, конань прявткурозо Нефтегорск ошсо (прявтось И.М.Федоров). Стазельть национальной оршамот 36 тыщат целковоень питнесэ. Самара ошонь 138 школасо панжозь мокшэрзянь класс, ков тиринь келень тонавтнеме якить малав 20 эйкакшт.
Кузнецов лембе валсо ледстинзе весе сетнень лемест, кить ламо вий путсть ды путыть вейсэнь тевтнень топавтомасо. Сынст ютксо Самара ошонь 138 школань прявтось Л.Н.Панькина, тиринь келень тонавтыцясь В.И.Алексеева, Красноярской райононь Волжский поселкасо “Кудо” вейсэндявксонь отделениянь прявтось Е.Н.Мезинова, морыцятне Л.Дюдяева, А.Славкин ды лият. Эйстэст ламотненень, кода эстензэ А.М.Кузнецовненьгак, максозельть Шнамонь коневт Самарской губерниянь Думанть пельде.
Седе тов кортыцясь тешкстызе: весе неть тевтне авольть топавтово, а максындерявольть лезкс Самара ошонь администрациясь (прявтось Г.С.Лиманский), Новокуйбышевск ошонь прявтось А.П.Нефедов. Седейшкавань сюкпря сон евтась Самарской губерниянь Думань депутатонтень Н.Ф.Мусаткиннэнь, эрицятнень марто сюлмавксонь ладямонь коряс отделэнь ды НКЦ-нь прявтонтень Ю.Н.Якутиннэнь.
Эсест ояст туртов поздоровт евтасть сеть вейсэндявкстнэнь пельде, кодат улить Самарасо: чуважонь, казахонь, грузинэнь, аджаронь ды истя седе тов.
Кодамо покшчи моровтомо? Невтезель концерт, косо гайгсть морот рузонь, чуважонь, грузинэнь ды лия раськень кельсэ. Сехте ламотне ульнесть, чарькодеви, эрзянь. Сынст морасть кода башка морыцят, истя ансамблят. Васенценть серьгедизе “Килейне” ансамблясь (прявтось А.Глухов). Сон теезь аволь умок. Тень лангс апак вано васолга яволявтызе лемензэ. Репертуарозояк аволь вишкине. Эйсэнзэ седе ламо эрзянь морот. Ансамблясонть 16 морыцят ды весе сынь, весемева маряви, пек вечкить эрзянь морот.
“Килейненть” мельга моронь кужонть поладызе “Эрзяночка” (Нефтегорск), “Умарина” (Иссакла), “Валдо ойме” (Красноярской райононь Новосемейкина веле) ды лия коллективтне. Весе сынь морасть кода содавикс, истя эсест морот. Шенталасто ансамблясь невтсь натой эрзянь кезэрень свадьбань кой. Те корты вейкеде: тосонь эрзятне эзизь стувто эсест келест ды коест, весе седейсэ вечкить эрзянь морот. Тенень кемевтемакс ульнесь сеяк, кода вастасть морыцятнень кунсолыцятне: эрьва мородонть мейле залось пешкелесь цяпамодо.
Пек покш кеняркс эсензэ моротнесэ кандсь Людмила Дюдяева. Сон морси Волжской государственной хорсо. Покш лезкс максы “Килейне” ансамблянтень.
А евтавияк кода лембестэ пурнавозтне вастызь Мордовиясто морыцянть Анна Атласовань. Кадык весе сизекшнестькак (вастовомась мольсь вете част), кияк эзь туе, весе учость, зярдо карми морамо Анна Атласова. Зярдо сон лиссь сцена лангс ды серьгедизе “Вирь чиресэ” моронть, кунсоломонзо чийсть Культурань кудосо важодицятнеяк. Эзь кенере Атласова прядомс моронзо, залсонть, теке мерят, пурьгине зэрькстась. Цяпамотнень юткс човорявсть “браво” пижнематне. Истя вастозель эрьва морось. Концерттэ мейле ломантне сакшность ваксозонзо ды евтасть седейшкавань сюкпря моротнень кисэ, конатнень сон казинзе весень туртов.
Седейс токицякс лиссь вастовоманть прядовомазо. Весе морыцятне кедьсэст кирвазтезь штатол марто лиссть сцена лангс ды серьгедизь эрзянь раськень гимнанть (“Вирев молян”). Сынст вайгельтнень юткс поладовсть залсо аштицятнень вайгелест. “Вейсэ, эрзят, мазыйтяно, вейсэ, эрзят, виевтяно” моросто валтнэ ульнесть тердемакс пурнавомс вейс, эрямс вейке-вейкень чарькодезь, вейке-вейкенень лездазь. Ансяк сестэ минек раськесь а еми, карми виевекс, нардевекс ды сюпавокс. Истя улезэяк.
Р.Щанкина, Самара ош.
